2013年1月26日 星期六

蒜蓉炒菜心

 
材料
菜心 (1 斤半), 薑 (2 - 3 片), 蒜頭 (1 湯匙 - 切碎)
紹酒 (2/3 茶匙 - 贊酒用), 鹽 (2/3 茶匙), 糖 (2/3 茶匙)

做法
1) 清水清洗乾淨菜心, 備用.
 
2) 燒熱鑊落油, 爆香薑片及蒜蓉.
 
3) 加入菜心炒勻約 2-3分鐘, 贊酒, 加鹽及糖炒勻. 再兜炒一會即成.



2013年1月19日 星期六

腐乳蒸雞翼


今個星期六/日都好忙, 無時間在家玩煮飯仔, 幸好昨晚回亞媽家食飯都有時間玩咗一陣煮飯仔. 呢個餸係我同事介紹給我. 是一個既簡單又開胃好餸. 大家都不坊在家試吓煮.
 
材料
雞翼 12 隻, 腐乳 5 - 6 磚, 糖 2 茶匙, 豉油 2 - 3 湯匙, 生粉 1 茶匙
 
做法
1) 雞翼清洗乾淨, 備用.
 
2) 將腐乳壓爛與豉油, 糖及生粉拌勻醃約20 - 30 分鐘.
 
3) 用一個鑊加入水及蒸架, 當水滾時將已醃雞翼放入鑊中蒸15 分鐘就成了.
 
 
愛心小貼士
1) 若想更加惹味, 可用辣腐乳蒸雞翼, 味道會更加 "So Good"
 
2) 我同事介紹我蒸呢個餸時提我要加 "薑絲", 佢話蒸出嚟之後d "薑絲" 吸滿腐乳味餸飯食非常一流, 但我昨晚忘記了. 若大家想煮嚟食記住加入 "薑絲" 嘞!  

2013年1月13日 星期日

意式雜菜牛肉通心粉湯


Honey 好鍾意飲羅宋湯, 亦都好喜歡食通心粉, 他時時會開一罐羅宋湯+通心粉做小食. 但罐頭食物始終不夠健康. 今晚我就做了一個既健康又益養豐富晚餐給他. 而且在寒冬晚上食住佢確實係好温暖.

材料
安格斯牛肉 (1 盒 - 切粒), 洋蔥 (1 個 - 切粒或切條)
甘荀 (1 條 - 切粒), 西芹 (3 條 - 切粒), 蒜頭 (4 粒 - 切碎)
意大利蕃茄粒 (1 罐), 紅腰豆 (半罐), 雞湯 (約 2 杯 - 500 ml)
暖水 (約 3 杯 - 750 ml)

做法
1) 牛肉清洗乾淨抺乾, 用黑胡椒醃勻備用.

2) 打開紅腰豆罐頭蓋, 倒去罐中鹽水, 用水沖洗瀝乾備用.

3) 燒熱鑊落油煎至牛肉金黃色. 取出備用.

4) 預備一個鍋落油, 爆香洋蔥炒至軟身, 下蒜蓉爆香, 加入甘荀及西芹炒勻煮約 3 分鐘. 下蕃茄粒, 雞湯及暖水, 當湯汁滾後煮約 5 分鐘. 加入紅腰豆及通心粉煮熟. (跟通心粉包裝時間指示煮熟, 但切勿煮得過久淋晒) 然後就可以同心愛人一齊享用嘞! 
 
 
煮了一大鍋益養豐富又健康通心粉湯, 一家人食完後既飽足又温暖.

 
 

德國咸豬手


上星期六煮咗羊腩煲, 今星期想煮番餐西餐, 但諗咗好耐都唔知煮咩好? 結果諗到啦.............就係 "德國咸豬手" 我好開心亦好感動, 當我從焗爐取出咸豬手時, 那一刻我真係好感謝主, 自小我從來都無諗過會做煮飯婆, 但我今天唔單止會愛玩煮飯, 而且今日仲整了一隻德國咸豬手, 呢 d咁特別地道西餐美食當然係去專食德國菜店鋪食嘞, 怎會想到今日自已會煮到 "德國咸豬手" 天父阿! 你恩典何其偉大又豐足,
讚美主!

材料
急凍咸豬手 (1 隻), 洋蔥 (1 個 - 切粒), 西芹 (3 條 - 切粒)
甘荀 (1 條 - 切粒), 月桂葉 (2 - 3 片), 黑啤酒 (2 杯 - 約 500 ml)
水 (2 杯 - 約 500 ml), 蜜糖 (適量)

做法
1) 咸豬手放入滾水中汆水約 10 分鐘, 然後撈起備用.

2) 洋蔥, 西芹及甘荀清洗乾淨切粒.

3) 用一深鍋燒熱油, 加入洋蔥, 西芹, 甘荀及月桂葉炒香, 然後倒進暖水及黑啤酒. 當水滾起時加入咸豬手炆煮 1 小時, 然後撈起備用.

4) 預熱焗爐 200 - 220 度, 用錫紙包住焗盆搽上一層油放上咸豬手, 放入焗爐焗約 30 分鐘, 然後搽上蜜糖焗 5分鐘, 反轉另一邊搽蜜糖再焗 5分鐘, 取出靜待10 分鐘後切片慢慢食用.
 
  
 


2013年1月12日 星期六

日式咖喱椰菜花

 
平時玩煮飯仔都會加碟炒菜或烚菜, 但時時都係咁煮法真係有d悶, 哈哈......所以今攪攪新意思, 見雪櫃剩番幾粒甜咖喱磚, 就用佢嚟煮碟開胃送飯小菜
 
材料
椰菜 (1 個 - 切件), 日式甜咖喱磚 (3 粒), 鹽 (適量)
 
做法
1) 清洗乾淨椰菜花, 將鹽及椰菜花放入滾水中拖水 3分鐘。撈起瀝乾水份備用.
 
2) 用一個鍋燒滾開水, 加入咖喱磚煮溶, 然後放入椰菜花煮約 8-10分鐘, 加入適量鹽調味就可享用.
 
 
愛心小貼士
若想食辣d, 可以加入咖喱粉與咖喱磚一齊煮溶, 然後繼續煮椰菜花, 味道就會變得更香濃及惹味.



2013年1月10日 星期四

粉絲蒸紅鮪

 
今次呢個 "粉絲蒸紅鮪" 是我跟奶奶學, 確實係不錯餸菜. 簡單又夠鮮味. 大家不坊試吓煮嚟食.
 
材料
紅鮪 ( 1 條), 粉絲 (1 包), 薑 (適量 - 切絲)
 
做法
1) 清洗乾淨紅鮪, 粉絲放於水中浸至變軟身及剪開一半.
 
2) 用鑊注滿水及放入蒸架, 將粉絲平放於碟上, 再放上紅鮪及薑絲, 然後放入蒸架上蒸 13-15 分鐘後取出備用.
 
3) 另預備一隻燒紅熱油鑊, 將熱油淋下魚身, 再加豉油, 便可慢慢享用.
 




2013年1月5日 星期六

羊腩煲


天寒地凍! 攪到個人手又凍腳又凍, 一定一定要煮 d 暖笠笠食物保暖先得!
 
食 "羊腩煲" 絕對是一個至佳好選擇. 嘻嘻........今次呢個 "羊腩煲" 係在昨天 "一生一世 (2013年1月4日)" 晚上炆定架, 所以留待今晚食時更加軟稔入味.
 
材料
羊腩 (約 2 磅), 冬菇 (8 隻), 枝竹 (1 包), 馬蹄 (半磅)
薑 (6 - 7 片), 蒜頭 (6 - 7 粒 - 切片), 乾蔥頭 (3 粒 - 切片)
陳皮 ( 1 片), 香葉 (4 - 5 片), 南乳 (1 大磚)
柱侯醬 (約 2.5 湯匙), 花生醬 (約 2.5 湯匙), 冰糖 (2 小粒)
 
做法
1) 羊腩先用清水洗乾淨, 汆水備用. 冬菇浸軟, 去蒂, 浸冬菇水留待備用.
 
2) 燒熱鑊落油, 爆香薑, 蒜頭及乾蔥頭, 跟住加入羊腩兜炒片刻. 用紹酒爆香. 再下馬蹄炒勻.
 
3) 加入南乳, 柱侯醬, 花生醬爆香羊腩, 注入暖水浸過羊腩. 放入陳皮, 香葉及冰糖.
 
4) 蓋上鑊蓋炆煮約10 分鐘後, 將所有材料倒進砂煲內繼續炆煮, 當水滾起時轉細火炆煮 30分鐘, 跟住熄火焗 15分鐘, 再開火加入冬菇及冬菇水, 當水滾轉小火炆煮 20分鐘, 再熄火焗15分鐘, 再次開火, 當水滾時轉小火炆煮 20分鐘熄火, 留待隔天備用.
 
5) 第二日再大火煲滾後加入枝竹, 轉小火炆煮約10 - 15 分鐘, 然後一大鍋上飯枱, 開著 Gas爐加入唐生菜慢慢享受食用暖笠笠晚餐.
 


2013年1月4日 星期五

愛你一生一世

 
2013年1 月4日 (愛你一生一世) 好有意思日子, 這一天大家與伴侶有無特別節目呢? 我同 Honey 這天就無什麼特別節目. 照如常返工放工回家食飯. 只是今晚我在煮廚好用心為他煮了一鍋羊腩煲預備明日晚飯享用, 用他鍾愛食物來表達對他的愛. 老公, 愛你一生一世! *3*
Related Posts Plugin for WordPress, Blogger...