夠(薑)芝麻湯圓蕃薯糖水

今晚放工在路上, 一直諗煮糖水食好不好? 煮咩糖水食好呢?
 

最後我決定煮夠 "薑" 蕃薯糖水. 因為我鍾意食蕃薯, 加上天氣開始轉涼, 食番個夠晒 "薑味" 糖水來暖一暖都好架.

奶奶好喜歡個糖水夠晒 "薑味", 而老公就無食蕃薯, 反而用糖水煮了芝麻湯圓食, 嘻嘻.......我同奶奶都跟老公每人要了兩粒湯圓, 結果就變成了  "夠(薑)芝麻湯圓蕃薯糖水"

材料
芝麻湯圓 (7 粒), 蕃薯 (2 個 - 切粒)
薑 (15-20片), 片糖 (2 1/2 條)

做法

1) 燒滾一鍋水, 加入片糖煮溶, 試味 (調較自已喜歡甜度).

2) 下薑片煮約10 分鐘, 加入蕃薯煮約 20-25分鐘.

3) 加入芝麻湯圓, 待湯圓浮上面, 就熄火慢慢盛起享用.

 

 



 

甘筍金菇菜炒帶子

 

奶奶最緊脫了爛牙, 所以食嘢能力唔係太好, 所以煮了一些簡單小菜, 讓她容易咀嚼. 雖然係好簡單, 但味道絕對係有水準. 盼望奶奶牙患早日康復.

 

材料

新鮮帶子 (1 包 - 約 20 粒), 甘筍 (1 條 - 切絲)
金菇菜 (1 包), 蒜頭 (4 粒 - 切粒)

醃料
生抽 (1 茶匙), 胡椒粉 (少量), 麻油 (少量)

調味料
清雞湯 (約 6 湯匙), 蠔油 (1 湯匙), 鹽 (少量)
糖 (半茶匙), 暖水 (約1碗), 紹興酒 (半茶匙 - 贊酒用)

做法
1) 清洗乾淨帶子, 汆水, 盛起隔水, 用醃料醃約 20 -30分鐘.

2) 甘筍去皮, 清洗乾淨, 切絲. 金菇菜用水浸一會, 清洗乾淨, 備用.

3) 燒熱平底鑊落油, 下蒜頭爆香, 加入甘筍炒香, 下半碗暖水加蓋煮約 2分鐘.

4) 加入金菇菜炒勻, 贊酒, 下清雞湯及蠔油拌勻, 下鹽及糖調味, 加入少量暖水加蓋煮 2 - 3 分鐘, 下帶子炒熟, 盛起享用.



愛筵

今晚真係好開心, 因為又再可以同團契弟兄姊妹愛筵, 今次係打邊爐 + 自家叉燒, 仲試咗我新整 "柚子蜜蒟蒻啫喱"  我真係好感謝主! 賜下有"興趣"煮飯這個恩賜給我. 讓我有興趣不繼學習煮不同食物, 亦藉著喜歡煮飯可以同主內肢體建立更心友誼, 增進彼此間認識. 所以話呢.......信主兒女真係好幸福架!



我至愛 "叉燒" 哥

柚子蜜蒟蒻啫喱

 

 

糖醋排骨

糖醋排骨係我好喜歡餸菜之一, 但對我嚟講要整一件靚糖醋排骨絕對不容易, 今次呢個煮法係我首次嘗試, 效果都不錯, 但仍有d嚡, 究竟要點樣煮先至唔會嚡呢! 有無人可以話我知呀!?

材料

一字排骨 (6 條), 乾蔥 (1 粒 - 切粒), 蒜頭 (5 粒 - 切粒)

調味料
紹興酒 (1 茶匙), 生抽 (1 1/2 湯匙), 鎮江醋 (100 ml)
暖水 (200 ml), 片糖 (大半條)

做法

1) 清洗乾淨, 抺乾水份, 備用.

2) 燒熱鍋落油, 加入一字排骨煎至微黃色, 撥開一字排骨在邊位, 下乾蔥及蒜頭爆香.

3) 贊酒, 下生抽, 鎮江醋, 暖水及片糖兜勻一字排骨, 細火炆煮約 30分鐘 (其間要留意是否要加暖水及試味), 最後開蓋煮至收汁, 盛起享用.

 

日式毛茄炒牛柳絲

每日煮飯都要諗煮咩餸菜, 確實係唔容易, 今日呢個餸都係去到超市見到有咩就將佢地 mix 埋一齊, 再配合用日式醬料來煮, 效果有好好喎, Yeah!

材料

牛柳絲 (1 盒 - 已切絲), 毛茄 (1 盒 - 切粒), 蒜頭 (4 粒 - 切粒)

醃料

黑胡椒 (適量), 麻油 (少量)

調味料

料理酒 (1 茶匙), 醬油 (2 茶匙), 味醂 (1 茶匙)

做法

1) 清洗乾淨牛柳絲, 抺乾水份, 待煮之前10分鐘用醃料醃住.

2) 燒熱平底鑊落油, 爆香蒜頭, 下牛柳絲兜炒, 加入毛茄一齊同炒, 下調味料炒勻, 熄火, 用餘温炒至自己理想熟度, 就可盛起享用.

 



韓 Bear

又有手信收啦! 同事剛剛從韓國濟洲回來, 送了一個超級可愛穿著韓服 Bear Bear 熊公仔給我.

好喜歡這個公仔擺設, 做型亦好精緻美麗.

謝謝 Hello Cat 同事



上面紅色公仔係我, 另下圖有藍色公司是我一位公司的.

還有, 濟洲名產小食 "雞泡魚乾-辣味"

 

Happy hr

昨晚與主內肢體一齊食飯又一齊飲嘢。分享了大家近況及彼此需要，實在好喜歡這種聯誼，可以好坦誠分享，無須掩飾，願主保守祝福我們這份友誼.

中西合璧 - 沙薑粉迷迭香焗燒雞

Hello! 各位, 我靚唔靚啫? 又無流晒口水? 嘻嘻........我叫沙薑粉迷迭香燒雞, 個名係咪好長呢? 因為我係中西合璧混合產品. 等我詳細自我介紹吓.

材料
冰鮮雞 (1 隻)

醃料
沙薑粉 (1 包), 海鹽 (約 1 湯匙), 迷迭香 (2 扎)
老抽 (約 1 湯匙), 黑胡椒 (約 1 茶匙), 牛油 (適量), 蜜糖 (適量)

做法
1) 清洗乾淨冰鮮雞, 抺乾淨水份, 在雞表面及內腔都均勻搽上海鹽及沙薑粉, 現後放入雪櫃雪過夜.

2) 第二日從雪櫃取出醃過雞, 放在室溫放暖, 預熱焗爐160度, 然後在雞身均勻曬上黑胡椒及搽上老抽. 然後將迷迭香放入雞腔內跟住用針封住, 最後在雞身上均勻搽上牛油, 放入焗爐用180度旋轉焗雞, 約 35-40分鐘後用針插入雞腿厚肉處, 只見透明水流出即是熟透. 然後在雞身上搽上蜜糖用220度旋轉焗約 5分鐘, 再搽多一次蜜糖旋轉焗約 5分鐘, 然後取出雞放涼約10分鐘切件上枱即可享用.

  

菜脯炒蛋

又係一個開胃簡易食譜

材料
雞蛋 (4 隻), 即食菜脯 (1 包), 蔥段 (少量)

做法
1) 菜脯用熟水及少量鹽浸10分鐘.

2) 雞蛋打勻, 下蔥段拌勻.

3) 燒熱平底鑊落油, 下菜脯炒香, 加入雞蛋兜勻煮至半熟透, 熄火用餘温煮至自己理想熟透程度.



芝麻柚子蜜豬腩肉片炒節瓜

天兔已走了, 天文台及傳媒都話呢個風係今年最勁颱風, 但我從昨晚到今早佢走咗, 都感覺唔到佢有嘅勁. 算啦! 都係專心玩我煮飯仔. 屋企有包急凍豬腩肉片, 就去街市買了個節瓜, 用了我家中 "日式芝麻醬" 及 "韓式柚子蜜" 煮咗過日韓餸菜出嚟.
呵呵.......酸咪咪, 又好香柚子蜜味, SO GOOD!

材料
豬腩肉片 (1 包), 節瓜 (1 個 - 切條)
蒜頭 (4 粒 - 切粒), 乾蔥 (1 粒 - 切粒)

醃料
生抽 (1 茶匙), 糖 (3/4 茶匙), 紹興酒 (半茶匙)
麻油 (半茶匙), 生粉 (3/4 茶匙)

調味料
日式芝麻醬 (2 湯匙), 柚子蜜 (1 1/2 湯匙)
鹽 (半茶匙), 糖 (1 茶匙), 暖水 (3/4 湯碗)

做法
1) 豬腩肉片解凍, 清洗乾淨, 抺乾水份, 用醃料醃約 20 分鐘.

2) 節瓜去皮, 清洗乾淨, 開半再切條狀.

3) 燒熱平底鑊落油, 下豬腩肉片炒至半熟透, 盛起備用.

4) 再燒熱鑊落油, 下蒜粒及乾蔥爆香, 加入節瓜炒香, 贊酒, 下暖水加蓋轉細火煮約5分鐘, 加入豬腩肉片兜勻, 下鹽及糖調味, 最後加入已混合日式芝麻醬及柚子蜜一齊炒勻, 就可熄火盛起享用.



炒雜菜薈

 

前日在家打邊爐, 食剩不少蔬菜, 正好今晚就用佢地嚟煮個炒雜菜薈. 

 

材料

金菇菜 ( 1 包), 娃娃菜 (2 個)

 

調味料

蠔油 (1 湯匙), 清雞湯 (3 湯匙), 紹興酒 (半茶匙-贊酒用)

鹽 (少量), 糖 (3/4 茶匙)

 

做法

1) 金菇菜及娃娃菜清洗乾淨.

 

2) 燒熱平底鑊落油, 下娃娃菜及金菇菜同炒, 贊酒, 加入蠔油及清雞湯炒熟, 下鹽及糖調味炒勻, 盛起享用.

 



瑞士汁雞

 



天兔被譽為今年最强颱風, 深信好多人今早已買定晒餸菜, 在家玩吓煮飯仔, 同家人輕輕鬆鬆食飯傾吓計渡過. 今日我亦都攞番支早前去灣仔買 "鉅利醬油" 出嚟, 嘗試煮 "瑞士汁雞" , 今次呢個煮法我仲加咗香葉及八角, 令到汁料更加香濃入味.

 

材料

雞 (1 隻), 香葉 (5 塊 - 撕開), 八角 (2 粒)

 

醃料

鹽 (2 茶匙), 紹興酒 (1 茶匙)

 

調味料

鉅利醬油 (1 支), 清雞湯 (約 700 ml), 水 (約300 ml)

冰糖 (隨個人口味調配), 玫瑰露酒 (2 湯匙), 薑 (2 片)

 

做法

1) 將雞清洗乾淨, 抺乾水份, 用醃料醃 1 晚.

 

2) 第二天煮之前1 個鐘從雪櫃取出已醃雞, 解凍, 備用.

 

3) 用一個窄身深鍋 (剛好放入隻雞就OK), 將以上調味料, 香葉及八角放入鍋內, 煲滾後試味, 然後放入雞, 細火煮10分鐘, 反轉另一邊煮10 分鐘, 再反轉煮5 分鐘, 熄火焗1 5分鐘, 取出靜待10分鐘就可切件食用.

 



 

 

  

 

星洲酸辣咖喱薯仔雞翼

今日回娘家與家人共渡了一個開心一天, 我仲帶了教會姊妹送給我新加坡咖喱醬料手送同家人一齊分享, 煮了一個好惹味又開胃星洲咖喱雞翼. 大家睇睇食譜.

材料

雞翼 (12 隻), 薯仔 (2 個 - 切件), 蕃茄 (3 個 - 切件)

蒜頭 (4 粒 - 切粒)

醃料

鹽 (約1 茶匙)

調味料

新加坡咖喱醬 (1 包), 紹興酒 (1 茶匙), 鹽 (約1 茶匙)

糖 (約 1 茶匙), 椰漿 (約 100 - 150 ml), 暖水 (約1 1/2 碗)

做法

1) 清洗乾淨雞翼, 用醃料醃約30 分鐘, 備用.

2) 薯仔去皮清洗乾淨, 切件, 備用.

3) 蕃茄清洗乾淨, 切件, 備用.

4) 燒熱平底鑊落油, 將雞翼煎至微金黃色, 盛起備用.

5) 再燒熱平底鑊落油, 下蒜頭爆香, 加入薯仔炒香, 贊酒, 下蕃茄炒勻.

6) 再加入雞翼炒勻, 下新加坡咖喱醬兜勻, 加入暖水加蓋煮約 8-10 分鐘 (其間留意是否要加水), 然後下椰漿拌勻, 再煮約 5 分鐘, 就可熄火盛起享用.
 

姊妹送給我手送.........呵呵.........好好味呀!

開心中秋飯

今晚我家好熱鬧, 因為 Honey 家人都來了食飯. 今晚打邊爐 + 自家出品 "叉燒" 及甜品, 由昨晚就己經預備食材. 今早亦已出動去買打邊爐食材, 回到家又洗又切, 忘了一整天, 但看見大家食得咁開心又滋味. 就覺得辛苦d都係值得.



自家出品 "叉燒"

 http://manlee662004.blogspot.hk/2013/05/blog-post_19.html

自家甜品 "咖啡蒟蒻啫喱"

http://manlee662004.blogspot.hk/2013/09/blog-post_12.html

中秋夜愛心糖水

好甜! 好冧! 好開心呀!

今晚中秋月圓之夜, Honey 親手為我煮了一碗愛心糖水, 若我無記錯這是他第一次為我煮甜品. 所以特別開心又冧爆. 一定要係到 post 吓先得. 作個記念. 將來睇番都必定會好回味這甜絲絲甜品.

 



中秋節快樂!

各位, 中秋節快樂! 祝大家開開心心團團圓圓!

大家同家人一齊食完飯未呀? 係咪預備出門去賞月呢?

今晚我家就只係同 Honey 及奶奶出街食吓壽司, 然後就回家了, 因為我要預備明晚中秋節晚餐. 無錯, 我家明晚才做節, 因為明日我同 Honey 先有足夠時間去買餸, 我地會打邊爐, 再加我自家焗 "叉燒" 及甜品 "咖啡蒟蒻啫喱"

是的, 這兩款食物, 是我及家人現時至愛食物精選, 所以好自然都會用佢地嚟招呼親戚朋友.

呵呵.........要開工去預備食物喇! 下次再傾過.

 



 

南瓜炒西蘭花

好耐無 post 個我至愛南瓜餸, 而我直覺覺得南瓜配西蘭花煮出嚟呢個餸應該會好靚及有夠健康, 但因呢個餸係我較早之前煮的, 所以我唔係太記得調味或時間上的細節, 可能會有d差異, 就請大家多多包涵.

材料

西蘭花 2 個 (切件), 南瓜 1/2 個 (切小粒)

蒜頭 4 - 5 粒 (切碎), 暖水 大半碗

做法

1) 西蘭花清洗乾淨切件, 用一鍋滾水加鹽, 下西蘭花汆水, 然後撈起用凍水沖水, 瀝乾待用.

2) 燒熱鑊落油, 下蒜蓉爆香, 加入南瓜炒香, 下暖水加蓋煮約 2-3分鐘.

3) 開蓋加入西蘭花炒勻, 下鹽及糖調味及炒勻煮約 2-3 分鐘就可慢慢享用.



香辣豆瓣醬炒四季豆雜丸

這是一個開胃惹味好餸, 亦係我清清雪櫃剩餘食物及醬料好時候, 大家睇睇雪櫃有咩剩餘食物材料及醬料, 然後動動腦筋諗吓什樣配搭, 妳就能創作出一碟自家好味撚手小菜.

材料
四季豆 1 包 (撕去老筋, 再切段)
雜丸 (包括牛丸, 貢丸, 黑魚丸, 魚蛋 - 全部切開一半)
蒜頭 5 粒 (切小粒), 乾蔥 2 粒 (切小粒), 指天椒 4 粒 (切小粒)
豆瓣醬 2 大茶匙, 暖水 (約半碗), 鹽 (適量), 糖 (適量)

做法
1) 清洗乾淨四季豆及切段後, 就要汆水, 然後盛起備用. 雜丸清洗乾淨切半.

2) 燒熱鑊落油, 爆香蒜頭, 乾蔥及指天椒, 再下豆瓣醬兜勻, 加入四豆炒勻後, 加入暖水及加蓋煮約 2-3 鐘, 加入雜丸炒勻再加蓋煮約 3分鐘, 下適量鹽及糖調味, 熄火盛起碟上慢慢享用.

 

 

我係用公司同事在北京買番嚟給我豆瓣醬煮呢個惹味餸



焗叉燒

哈哈.......出世啦! 我嚿 "叉燒" 出世啦! 恭喜我喇!
好開心又興奮, 今次一tick過成功了.

我係參照 "簡易食譜" 及 "美味娘娘" 食譜書籍加以改良而成. 在此我要多謝她們.

其實整叉燒除了肉質要夠新鮮, 醃的時間亦都好重要. 最少都要醃 3小時以上, 或早一日前醃定更理想. 而焗的時候要預留多少少汁料用來淋在叉燒上上色, 及留意汁料收乾情況. 咁就能做出一嚿靚 "叉燒"

材料
脢頭肉 ($30), 李錦記叉燒醬 (3 1/2 湯匙), 麥芽糖 (1 1/2 湯匙)

醃料
紹興酒 (3/4 湯匙), 生抽 (3/4 湯匙), 老抽 (半湯匙), 薑汁 (2 茶匙)


做法
1) 清洗乾淨脢頭肉, 抺乾淨水份, 用叉燒醬及醃料醃約 3 小時以上.

2) 用熱水座溶麥芽糖, 備用.

3) 預熱焗爐220度, 將脢頭肉及汁料放在焗盤中用鍚紙包住放入焗爐焗30分鐘.

4) 然後打開鍚紙蓋, 焗爐調較140度, 每邊焗10分鐘.(其間要不時淋上焗盤中汁料在叉燒上, 保持濕潤)

5) 跟住, 焗爐調較160度, 亦都每邊焗10分鐘. (其間要不時淋上焗盤中汁料在叉燒上, 保持濕潤)

6) 然後, 焗爐調較180度, 亦都每邊焗10分鐘. (其間要不時淋上焗盤中汁料在叉燒上, 保持濕潤)

7) 最後, 用掃均勻在叉燒表面掃上麥芽糖, 焗爐調較180-200度之間, 焗約10分鐘, 然後取出放涼10分鐘切件食用.

愛心小貼士

1) 每個人家中焗爐温度度數都可能有少少差異, 所以當由打開鍚紙焗那一刻開始, 大家要小心留意叉燒汁料有否好快會收乾晒及上色情況.

2) 不要太早下麥芽糖, 否則會好容易變焦黑. 



鮑汁螺片西生菜

宜家去實惠買嘢, 只需加多 $5x.00 就可以換購 "官燕棧鮑汁螺片" 2 罐, 呵呵...........巧抵呀! 今晚就用去嚟煮飯仔.

材料
鮑汁螺片 (1 罐), 西生菜 (1 個)

做法
1) 西生菜撕成一小片, 清洗乾淨, 備用.

2) 將西生菜放入已加了油及鹽滾水中灼熟, 盛起隔水, 放於碟上.

3) 將鮑汁螺片煮熟, 放在西生菜上就可食用.



孜然雞翼

早前去夏門旅遊, 在當地超市買了兩包孜然粉, 所以今晚想用佢嚟煮雞翼, 但其實我未試過用孜然粉煮餸, 今晚係我本人自家創作煮法, 估唔到有Ok 喎! 好香孜然粉味, 用嚟送飯一流.

材料

雞翼 (10 隻), 蒜頭 (5 粒 - 切碎), 乾蔥 (1 粒 - 切碎)

醃料

生抽 (1 茶匙), 鹽 (1 茶匙), 紹興酒 (半茶匙)

調味料

玫瑰露酒 (半茶匙), 孜然粉 (約 2 - 3 茶匙)

做法

1) 雞翼解凍, 清洗乾淨, 抺乾水份, 用醃料醃約30 分鐘.

2 燒熱平底鑊落油, 加入雞翼, 兩邊用慢火慢慢煎熟, 盛起備用.

3) 用原鑊再下少少油, 加入蒜蓉及乾蔥爆香, 加入雞翼炒勻, 下玫瑰露酒拌勻, 加入孜然粉用中大火炒香拌勻, 然後加蓋熄火焗一陣, 就可盛起享用.

 



在廈門超市購買 "孜然粉"

 

咖啡蒟蒻啫喱

上星期日約了幾位弟兄姊妹來我家 Dinner, 於是上網睇書揾食譜資料, 看見 May 姐介紹呢款甜品好吸引, 而且非常容易做, 於是就去試吓, 果然好無難度, 又有好香咖啡味甜品.

材料

UCC 炭燒咖啡粉 (2 湯匙), 啡糖 (4 湯匙), 滾水 (625 ml)

蒟蒻凍粉 (2 湯粉), 西梅亁 (6 粒), 花奶 (份量隨個人喜好)

做法

1) 將咖啡粉及啡糖加滾水攪拌至完全溶解.

2) 加入蒟蒻凍粉拌勻, 直至完全溶解於咖啡內.

3) 於啫喱杯內放入1粒西梅乾, 快速注入己拌勻咖啡啫喱.

4) 擱涼, 於啫喱杯封上鍚紙放入雪櫃雪至凝固, 食時伴上花奶慢慢享用.

 

 

 

麵醬南瓜鴕鳥肉

材料
南瓜 (半個), 駝鳥肉 (1 盒), 蒜頭 (4粒-切碎), 乾蔥 (1粒-切碎)

醃料

生抽 (1 茶匙), 糖 (半茶匙), 胡椒粉 (少許)
油 (半茶), 生粉 (半茶匙)

調味料

豆瓣醬 (1 1/2 大茶匙), 糖 (半茶匙), 鹽 (少量)
紹興酒 (半茶匙 - 贊酒用), 暖水 (半碗)

做法

1) 駝鳥肉清洗乾淨, 抺乾水份, 用醃料醃約20分鐘, 備用.

2) 南瓜去皮去籽, 清洗乾淨, 切粒, 備用.

3) 燒熱平底鑊落油, 下駝鳥肉爆香, 見轉微黃色, 盛起備用.

4) 原鑊再下少少油爆香蒜粒及乾蔥, 加入南瓜炒勻, 下豆瓣醬拌勻, 加入暖水加蓋煮約 2 - 3分鐘, 下駝鳥肉炒勻, 下糖及鹽調味, 盛起備用.

日式羊肉炒翠肉瓜

羊肉唔係個個鍾意食, 但我就好like, 我會用羊肉伴麵醬或京蔥來玩煮飯仔, 而今日想試吓用日式料理嚟煮吓, 效果有好好美味喎!

 

材料

羊肉 (1 包), 翠肉瓜 (1 條 - 切件), 蒜頭 (4 粒-切碎)

 

醃料

生抽, 糖, 胡椒粉, 麻油, 油, 生粉

 

調味料

日式醬油 (3 大茶匙),  味醂 (1.5 大茶匙)

料理酒 (半茶匙-贊酒用), 鹽 (少量), 暖水 (半碗)

 

做法

1) 清洗乾淨羊肉片, 抺乾水份, 用醃料醃約20分鐘, 備用.

 

2) 翠肉瓜清洗乾淨, 切件, 備用.

 

3) 燒熱平底鑊落油, 兜炒羊肉轉微黃色, 盛起備用.

 

3) 再燒熱原鑊下少少油, 下蒜蓉爆香, 加入翠肉瓜同炒, 贊酒, 下日式醬油及味醂炒勻, 加入暖水加蓋煮約2分鐘, 再加入羊肉同炒勻, 下鹽調味, 盛起慢慢食用.

 

我的新家

Hello! 大家好! 我終於搬咗過嚟啦! 請大家以後多多提點! 多多入嚟我 Blog 睇美食及留言. 雖然搬咗入嚟, 但仍有好多地方唔係好識得點用. 所以...............請大家俾多少少時間我去學習及適應.

而且我嚟緊兩個星期都好忙, 因教會都有不同服侍要參與, 但大家放心, 我係侍奉得好喜樂又感恩. 若大家看到呢篇文章時亦都可以為我祈禱, 禱告守望. 願一切事工都大大榮耀主名!

新家

 

各位, 我已經揾到新家啦! 但新家仍有好多地方要執執, 不過, 我相信大家唔會介意.

新家地址:http://manlee662004.blogspot.hk/


大家要繼續時時嚟我新家呀! 有妳/你地支持! 我會煮得更加起勁!





蠔汁本菇炒勝瓜

夏日炎炎, 選擇瓜類食品係最適合不過, 但原來我今年仲未煮過勝瓜, 今晚我就同勝瓜嚟過約會啦! 簡單易煮又清甜. 咁.....妳地又煮咗未呀?

材料

勝瓜 (1 條 - 切件), 日本白本菇 (1 包), 蒜頭 (切小粒)

調味料
紹興酒 (贊酒用), 蠔油 (2 湯匙), 鹽 (少量)
糖 (3/4 茶匙), 暖水 (小半碗)

做法
1) 勝瓜刨去硬角及切件 (用滾刀法切), 備用.

2) 白本菇切去根部, 用水浸一陣, 清洗乾淨, 備用.

3) 燒熱鑊落油, 下蒜粒爆香, 加入勝瓜及白本菇炒香, 贊酒, 下蠔油及暖水, 加蓋煮約1-2分鐘, 下鹽及糖調味, 熄火盛起享用.