2013年4月30日 星期二

南乳薯仔炆雞

 
材料
雞脾肉 (1 塊 - 切粒), 薯仔 (1 個 - 切粒)
蒜頭 (3 粒 - 切粒), 薑 (3 片)
 
醃料
南乳 (半磚), 糖 (半茶匙), 薑汁 (1 湯匙), 紹興酒 (1 湯匙)
 
調味料
冰糖 (1 小粒), 老抽 (1 湯匙), 南乳 (半磚)
 
做法
1) 雞脾肉清洗乾淨抺乾水份, 用醃料醃約30 分鐘.
 
2) 燒熱平底鑊落油, 爆香蒜頭, 薑及南乳(半磚), 加入雞件炒香, 再下薯仔及調味料炒勻. 注入暖水加蓋炆煮, 當水滾起時轉細火炆約 20分鐘, 熄火盛起食用.
愛心小貼士
炆煮其間要試味, 若太咸要加糖, 若太淡可以再下少少南乳, 總至調較到自己心水口味就ok


2013年4月29日 星期一

豉汁粉皮蒸排骨


昨天又是煮蒸排骨, 無辨法喇! 貪佢好味又夠快煮好有得食. 早前已試過煮南瓜蒸排骨, 今日想繼續攪啲新意. 所以今次就用了 "粉皮" 做主角. 哈哈........當碟主角出場時, 奶奶問係什麼 (指粉皮), 我告訴她係粉皮, 她一試食就好鍾意, 當然喇! 粉皮都吸滿所有豆豉汁精華, 絕對係一個開胃小餸.
 
材料
粉皮 (1 包 - 切條), 排骨 ($25 - 切件),
豆豉 (1 湯匙 - 剁碎), 蒜頭 (3 - 4 粒 - 切碎)
 
醃料
生抽 (1 1/2 湯匙), 糖 (1 茶匙), 油 (半茶匙), 生粉 (1 茶匙)
 
做法
1) 用水清洗排骨, 抺乾淨水份, 用醃料醃約 20 分鐘.
 
2) 粉皮切條, 放入滾水中煮 2 分鐘, 然後撈起用凍水沖洗, 備用.
 
3) 用鑊燒熱滾水, 將粉皮放在碟上, 已醃排骨放於粉皮上, 然後放入蒸架上蒸約 13-15 分鐘後取出慢慢享用.
 
 

2013年4月22日 星期一

蠔汁金菇菜炆雞翼

 
材料
金菇菜 (1 包), 雞翼 (10 隻), 香葉 (4 片), 蒜頭 (4 粒 - 切片)
乾蔥 (2 粒 - 切粒), 蠔油 (約 4 - 5 湯匙), 玫瑰露酒 (2 茶匙)
 
做法
1) 清洗乾淨金菇菜, 雞翼用水清洗乾淨後, 抺乾水份用鹽醃約30分鐘.
 
2) 燒熱平底鑊落油, 爆香蒜頭及乾蔥, 下雞翼炒香, 見開始轉微黃就下蠔油兜勻, 加入香葉及一碗暖水加蓋煮約8分鐘. (其間當水滾起時, 轉細火炆煮及下鹽及糖調味)
 
3) 然後加入玫瑰露酒, 下金菇菜煮約2-3分鐘, 熄火盛起慢慢享用.
 
 
愛心小貼士
當晚我係用了 2 茶匙玫瑰露酒, 所以煮出嚟金菇菜就酒味比較濃, 但雞翼酒味道就OK, 若大家不喜歡酒味太濃, 可以只下半茶匙或不加入都得架.


2013年4月20日 星期六

黑蜜牛奶綠茶@i-Square夢見屋


早前與同事專誠再到尖沙咀 i-Square 夢見屋食 Lunch. 因在較早前嚟呢到我地飲個一杯 "黑蜜牛奶綠茶" 就深深愛上了. 香濃綠茶, 啲 Cream 軟綿綿又唔流, 加上黑蜜糖調味, 令整杯飲品好 sweet 又涼快, 加上綠與白柔和配襯, 令到我對佢時時念念不忘 (嘻嘻..... 宜家講起都想order 杯飲呀!) 忡有, 因為我地係叫 Lunch Set 只需加 $10 就飲到啦. 原價一杯要 $35. 大家話係咪好低呢?
 
 
Send 埋個餐牌給大家睇
  
  
  


2013年4月19日 星期五

日式咖喱雞

 
材料
雞脾肉 (1 包 - 切件), 紅蘿白 (1 條 - 切粒), 薯仔 (1 個 - 切粒)
洋蔥 (1 個 - 切大件), 日式咖喱磚 (4 粒), 暖水
 
醃料 (雞脾肉)
鹽 (半茶匙), 生抽 (1 湯匙), 糖 (半茶匙)
 
做法
1) 雞件清洗乾淨, 抺乾水份及用醃料醃約15分鐘, 紅蘿白,薯仔及洋蔥切件.
 
2) 燒熱深鍋下牛油, 炒香洋蔥, 紅蘿白及薯仔, 煮約 3 分鐘後, 下雞件兜勻煮2-3分鐘, 加入暖水, 當水滾起時轉細火加蓋煮約10 - 15 分鐘, 加入日式咖喱磚煮約5 - 8 分鐘, 熄火盛起享用.
 
 
愛心小貼士
若太多水,可以開蓋大火煮1-2分鐘收汁, 若太濃稠,可以加一點暖水煮稀.


2013年4月9日 星期二

日式西蘭花炒豬腩肉片


最近我勁愛上日式超市賣豬腩肉片, 一包約 $20 豬腩肉片份量都不少, 外型好似肥牛肉, 肉質鮮嫩, 用嚟炒各樣餸菜都得, 今次我就用佢煮了一個日式料理喇!
 
材料
西蘭花 (2 個 - 切件), 豬腩肉片 (1 盒)
蒜頭 (5 粒 - 切碎), 乾蔥 (2 粒 - 切粒)
 
醃料
生抽, 紹興酒, 糖, 胡椒粉,生粉 (各適量)
 
調味料
醬油 (3 茶匙), 味醂 (1 1/2 茶匙), 料理酒 (1 1/2 茶匙)
 
做法
1) 西蘭花切件清洗乾淨, 在滾水中加入鹽放入西蘭花汆水, 然後盛起放入冰水中, 冷卻後盛起備用.
 
2) 豬腩肉片清洗乾淨, 抺乾淨水份, 用醃料醃15分鐘.
 
3) 燒熱平底鑊落油, 下豬腩肉片炒至轉微黃色就盛起備用.
 
4) 再燒熱鑊落油, 下蒜蓉及乾蔥爆香, 加入西蘭花炒勻, 下料理酒炒勻, 加入豬腩肉片下醬油及味醂兜勻, 加蓋煮約 2 - 3 鐘就可享用.
 
 

2013年4月8日 星期一

豆豉南瓜蒸排骨


自從奶奶隻手受傷後, 我宜家晚晚都變身成為一位煮飯婆, 日頭己經忙於工作, 一放工就要嗱嗱淋趕住去街市買餸, 驚遲少少去到街市都已無餸買, 仲要諗定煮咩餸能在最短時間內煮好, 確實真係唔容易, 哈哈...........幸好今晚呢個 "豆豉南瓜蒸排骨" 就係一個極之簡單, 容易煮又好好味餸菜, 大家都認同嗎?
 
材料
南瓜 (約 1/8個 - 切小粒), 排骨 $32
豆豉 (約 1 1/2 湯匙 - 剁碎), 蒜頭 (4 - 5 粒 - 切碎)
 
醃料
生抽 (2 湯匙), 糖 (1 茶匙), 油 (半茶匙), 生粉 (1 茶匙)
 
做法
1) 用水清洗排骨, 抺乾淨水份, 用醃料醃約 20 分鐘.
 
2) 用鑊燒熱滾水, 將已醃排骨及南瓜放於蒸碟上, 然後放入蒸架上蒸約 13-15 分鐘後取出慢慢享用.
 
 


蒜蓉炒椰菜花

 
材料
椰菜花 (3/4 個 - 切件), 蒜頭 (6 粒 - 切碎), 薑 (切 4 片)
 
調味料
米酒 (1 茶匙), 蒜蓉雞粉 (約 1 1/2 茶匙), 糖 (1 茶匙)
 
做法
1) 燒熱鑊落油, 下薑片及蒜蓉爆香, 加入椰菜花炒勻, 約炒 2-3 分鐘後見菜葉開始軟身就加入調味料, 再炒一陣盛起享用.


2013年4月7日 星期日

黑啤豆瓣醬炆一字排骨


今晚用了Honey送給我新玩具煮了一頓豐富晚餐, 而我奶奶極之滿意, 她仲給我100分添呀! 呢個餸唔難煮, 相信大家都做到架, 試吓喇! 稍後再介紹我新玩具.

材料
一字排骨 $35, 黑啤酒 (1 罐), 蒜頭 (5 粒- 切片)
乾蔥 (3 粒- 切片), 薑 (4 片)

醃料
生抽 (1 1/2 湯匙), 糖 (1 茶匙), 生粉 (1 茶匙)

調味
豆瓣醬 (約 2 湯匙), 糖 (約 1 茶匙), 麻油 (1/2 茶匙)

做法
1) 一字排骨清洗乾淨, 抺乾淨水份, 用醃料醃約 30分鐘.

2) 燒熱平底鑊落油, 下一字排骨煎至兩面金黃色, 盛起備用.

3) 燒熱一個鍋落油, 加入薑片, 蒜片, 乾蔥片爆香, 再下豆瓣醬炒香, 加入一字排骨炒勻, 注入黑啤酒加蓋轉細火炆10-15分鐘.

4) 開蓋中火繼續煮至汁收乾, 加入糖及麻油調味撈勻, 就可盛起享用.
 
 
 下圖就係我新玩具, 我用了細鍋煮了這個 "黑啤豆瓣醬炆一字排骨"

 
 

2013年4月6日 星期六

豉椒菜脯炒鮮魷

 

材料
菜脯 6 - 7 條 (切粒), 鮮魷 1 隻 (切件), 豆豉 1 湯匙 (剁碎)
指天椒 4 - 5 隻 (切小粒), 蒜頭 4 粒 (切碎), 乾蔥 3 粒 (切碎)
 
醃料
鹽, 胡椒粉 (各適量)
 
做法
1) 鮮魷清洗乾淨切件, 放入滾水中汆水一陣, 撈起用醃料醃約15分鐘.
 
2) 燒熱鑊落油, 下蒜蓉, 乾蔥, 豆豉及指天椒爆香, 加入菜脯炒勻, 再下鮮魷兜勻, 加入適量滾水加蓋煮約 2-3 分鐘就熄火盛起享用.
Related Posts Plugin for WordPress, Blogger...