泡菜炒豬腩肉片

今晚又係一個超級簡單又惹味又夠晒韓風小菜. 唔該我要添飯.

材料

豬腩肉片(1 包), 泡菜 (約 1 飯碗份量), 蒜頭 (4 粒 - 切片)

醃料

生抽 (1 茶匙), 糖 (1 茶匙), 紹興酒 (半茶匙)

油 (半茶匙), 粟粉 (半茶匙)

調味料

鹽 (少量), 糖 (3/4 茶匙)

做法

1) 清洗乾淨豬腩肉片, 抺乾水份, 用醃料醃約20分鐘.

2) 燒熱平底鑊落油, 下蒜片爆香, 加入豬腩肉片炒至8成熟, 下鹽及糖調味, 加入泡菜兜勻炒至豬腩肉片熟透, 就可盛起享用.

在A超市買韓國泡菜



牛肩肉炒翠肉瓜

近來公司好忙, 基本上一返到公司就未停過, 電話不停響, 不停打報價單, 不停接order, 但還好未有影響我煮飯仔樂趣, 以下呢個餸大家鍾意嗎?

材料

澳洲安格斯牛肩肉  (2 件 - 切粒), 翠肉瓜 (1 條 - 切粒)

紫洋蔥 (半個 - 切碎), 蒜頭 (4 粒 - 切碎)

 

醃料

生抽 (1 茶匙), 胡椒粉 (少量), 油 (半茶匙)

 

調味料

香蒜雞粉 (1 茶匙), 紹興酒 (半茶匙), 糖 (1茶匙)

鹽 (適量), 暖水 (2 湯匙)

 

做法

1) 牛肩肉清洗乾淨, 抺乾水份, 用醃料醃約15 分鐘.

 

2) 翠肉瓜清洗乾淨, 切粒, 備用.

 

3) 燒熱平底鑊落油, 下牛肩肉煎至微黃色, 盛起備用.

 

4) 再用同一隻鑊落油, 下蒜蓉及紫洋蔥爆香, 加入翠肉瓜炒香, 贊酒, 下香蒜雞粉及暖水煮約 3 分鐘, 加入牛肩肉兜勻, 最後下糖及鹽調味, 熄火盛起享用.



飛天蠄蟧川貝湯

早幾日去SOGO 超市 shopping, 見啟泰藥業做緊 Promotion, 其中介紹一款湯水 "飛天蠄蟧川貝湯"  這個湯水好處有袪風利濕, 活血袪瘀, 清熱止咳. 今晚就煲去嚟飲, 亞姐教我只需加瘦肉及蘋果就得啦.

材料
瘦肉 ($20), 蘋果 (3 個)
湯包: 飛天禽蟧, 螺片, 粟子乾, 野生玉竹, 淮山, 貝母, 無花果乾.

普通煲湯做法
1) 將所有材料清洗乾淨. 瘦肉清洗乾淨及汆水.

2) 澆熱一鍋水, 下所有材料及瘦肉煲 3小時, 用鹽調味, 就可食用.


高速煲做法
1) 將所有材料清洗乾淨. 瘦肉清洗乾淨及汆水.

2) 用氣壓煲燒滾一鍋水後, 加入以上所有材料, 然後蓋上氣壓煲蓋, 當氣壓煲開始加壓, 就調較細火煲30分鐘, 然後熄火待減壓, 當減壓完後開氣壓煲蓋, 改用玻璃煲蓋再煲15分鐘加鹽調味就可飲用.



迷迭香焗豬仔骨

今日這個焗豬仔骨係教會一位好姊妹推介, 街市最近凍肉店入了這款豬仔骨, 又大件又扺買, 雖然係凍肉, 但煮出嚟味道同西餐廳無分別, 妳仲可以用不到調味料去自家創造喜歡味道, 以下就係我自創調味方法. 我家人個個都讚好味.

材料
豬仔骨 (1 條)

醃料
生抽 (1 湯匙), 海鹽 (1/3 茶匙), 糖 (1 茶匙)
黑胡椒粉 (1/2 茶匙), BBQ燒烤醬 (3 湯匙), 迷迭香 (2 束)

做法
1) 先將豬仔骨解凍, 清洗乾淨, 抺乾水份, 均勻搽上醃料放入雪櫃醃一晚.

2) 從雪櫃取出醃了一整晚豬仔骨解凍, 開焗爐 220 度預熱, 用錫紙包住豬仔骨放入焗爐焗約 25 分鐘.

3) 期間調製 1湯匙蜜糖 + 1湯匙BBQ燒烤醬撈勻做成 "蜜糖燒烤汁"

4) 然後拿開蓋面錫紙, 調較焗爐200度, 在豬仔骨表面均勻搽上一層 BBQ燒烤醬放入焗爐焗 7分鐘, 反轉背面搽一層BBQ燒烤醬放入焗爐焗 7分鐘, 之後再反轉表面用 "蜜糖燒烤汁" 均勻搽在豬肋骨上焗 7分鐘, 然後從焗爐取出豬仔骨靜止約 10 分鐘, 就可盛起食用.



蘿白炆牛肋條

這幾天出街已感覺涼咗好多, 各位blog友記住穿多件外套, 免冷親呀!

好想煮d同呢個秋涼季節有關食物, 想起 Honey 好鍾意食蘿白炆牛腩 (時時叫我煮). 又想起我家中有一包牛肋條未用. 咁不如用嚟煮蘿白炆牛肋條. 雖然唔係牛腩, 但煮咗出嚟之後, Honey 勁鍾意食, 佢話同牛腩味好似, 亦同街外食一樣, 總至他好Like. 呵呵........Honey 你鍾意, 我就開心喇. 應承你下次用牛腩煮俾你食.

材料

牛肋條 (7 條 - 每條切 3-4 件), 白蘿蔔 (半個 - 切粒)
紅蘿蔔 (1 條- 切粒), 八角 (3 粒), 薑 (3 片), 蔥 (1 束 - 切段)

調味料
柱侯醬 (2 湯匙), 冰糖 (小粒), 暖水 (蓋過蘿白及牛肋條就得)
生抽 (1 茶匙), 蠔油 (1 茶匙)

做法
1) 牛肋條清洗乾淨, 下蔥汆水, 備用.

2) 白蘿蔔及紅蘿蔔去皮及清洗乾淨, 用滾刀法切粒.

3) 燒熱高速煲下薑片爆香, 加入白蘿蔔及紅蘿蔔, 下柱侯醬炒勻, 下八角, 冰糖及暖水(能蓋過蘿白及牛肋條就得), 然後蓋上氣壓煲蓋, 當氣壓煲開始加壓, 就調較細火煲18分鐘, 然後熄火待減壓, 當減壓完後開氣壓煲蓋, 下生抽及蠔油調味. 就可熄火食用. 

蕃茄薯仔南瓜湯

今日教會癌關團契攪了行山活動, 同眾弟兄姊妹過了一個開心又感恩郊遊玩樂日.

而今晚煲了一個超級簡易又好清甜湯水, 而且營養成份仲好高添! 大家今日飲咗湯未呀?

材料
蕃茄 (6 個 - 切件), 薯仔 (1 大個 - 切粒)
南瓜 (半個 - 切粒), 煲湯骨 ($20)

做法
1) 煲湯骨清洗乾淨, 汆水, 備用.

2) 蕃茄清洗乾淨及切件. 薯仔去皮, 清洗乾淨及切粒. 南瓜去籽去皮, 清洗乾淨及切粒.

3) 深鍋煲滾一鍋水後, 加入所有材料, 滾後轉細火煲約 1 個鐘, 下適量鹽調味, 再煲15分鐘, 熄火慢慢享用.





另類飯後甜品

早前去咗醫院做照腸鏡及胃鏡, 今日回醫院覆診聽報告, 感謝主! 肝,胃及大腸都好正常, 只係小腸驗出有輕微 "克羅氏菌" 是一種腸道發炎病菌, 要食 8 個星期藥, 每日三次, 每次兩粒. 唉!......我係寧願打針, 都唔鍾意食葯嘅人. 但為在身體好, 就當係飯後甜品食喇!

雙城牛肉芝士火鍋

今晚 Honey 話唔好玩煮飯仔, 出街過 2人世界, 我地又去咗食火鍋, 不過今次係食 "芝士火鍋 Cheese Fondue"

今次去咗意粉屋試去新推出 "雙城牛肉芝士火鍋"

WoW! 勁豐富菜單:
頭盤: 西班牙風乾牛肉及蘇格蘭煙三文魚黑醋沙律.

芝士火鍋配料有: 法包及意式香草包, 澳洲特級牛肉, 橄欖油香草槍魷魚, 香辣燒烤腸, 意式肉丸, 美國瘋薯條, 香草白菌, 西蘭花及螺絲粉.

用芝士料做的火鍋汁好香濃又美味, 芝士汁份量亦好足夠蘸食物, 再加上豐富食材, 我同 Honey 兩個人根本食唔得晒. 而且呢個餐都好抵食, 只需 $388. 我建議可以 3 - 4 個人叫一份火鍋餐食都足夠架!

 芝士火鍋好搭擋 "法包及意式香草包"

 頭盤: 西班牙風乾牛肉及蘇格蘭煙三文魚黑醋沙律

澳洲特級牛肉

橄欖油香草槍魷魚, 香辣燒烤腸, 意式肉丸, 美國瘋薯條

香草白菌, 西蘭花及螺絲粉



日式照燒洋蔥豬排

今日又再為我Honey 預備佢至愛 "豬排" 其實我對豬排麻麻地, 但既然 Honey 你咁鐘意, 我都會煮俾你食架.

 

材料

豬排 (4 件 - 每件切2塊), 洋蔥 (1 個 - 切條), 蒜頭 (4 粒-切片)

醃料
鹽 (半茶匙), 糖 (1 茶匙), 紹興酒 (半茶匙)
油 (半茶匙), 粟粉 (半茶匙)

調味料

日式燒烤肉汁 (1 湯匙), 暖水 (約4湯匙)

做法
1) 豬排清洗乾淨, 用刀背剁鬆, 用醃料醃約 20-30分鐘.

2) 燒熱平底鑊落油, 下豬排煎至兩面轉金黃色, 約 7 成熟, 就盛起備用.

3) 再燒熱平底鑊落油, 下蒜頭爆香, 加入洋蔥炒至軟身, 下豬排兜勻, 加入日式燒烤肉汁拌勻, 注入暖水加蓋轉細火煮約 2鐘, 即可熄火盛起享用.

 

日式燒烤肉汁



水牛城雞翼

昨晚一路寫 blog, 一路預備我今晚晚餐主角 "水牛城雞翼(Buffalo Wings)" 大家去過水牛城未呀? 我就未去過. 唯有食住隻雞翼當自已去過先啦! 當然真正水牛城雞翼係用好多材料製作而且係炸出嚟, 但這個 "焗" 簡易版食譜, 確實係方便又無咁油膩膩, 健康好多. 只係今次落多咗少少鹽醃，但味道真係好得呀!

材料
雞翼 (10隻)

醃料

Lawry's 水牛城BBQ醬 (5 湯匙), 鹽 (1/4 茶匙)
黑胡椒粉 (半茶匙), 紹興酒 (半茶匙)

做法
1) 雞翼解凍, 清洗乾淨, 抺乾水份, 用醃料醃過夜.

2) 從雪櫃取出己醃雞翼解凍, 預熱焗爐220 度, 平舖雞翼在焗盤架上 (醃料汁留用) , 用200 度焗 10分鐘, 取出反轉掃醃料汁焗 5分鐘.

3) 再反轉掃上醃料汁焗 8分鐘, 取出待涼食用.

水牛城 BBQ醬

預備入焗爐變身做 "水牛城雞翼"



焗蘆筍鯰魚柳

我絕對係一個電腦白痴, 希望blog 友可以幫幫我. 聽講將 Blogger 與 Google+ 分開會比較好, 所以我都分家了, 但我不是在 blogger 改名, 已是在 Google+ 改名, 做得啱嗎? 有無人可以話我知. 我宜家唯有每次post咗文章在版面後, 就按 g+1 將文章分享到 Google+, 咁樣做係咪正確呀? 有誰人可以告訴我. 

材料

鯰魚柳 (3 塊), 蘆筍 (1 包), 青檸 (半個)

調味料

鹽 (1 1/2 茶匙), 黑胡椒 (1 茶匙), 香草 (1 茶匙), 牛油 (適量)

做法
1) 預熱焗爐 220度, 將鯰魚柳及蘆筍分別清洗乾淨, 抺乾水份,用調味料拌勻.

2) 焗盤鋪了錫紙, 首先將蘆筍平鋪在焗盤內, 再將鯰魚柳放上面, 用錫紙包住, 放入焗爐用200度焗20分鐘, 熄火取出待涼10分鐘, 淋上青檸汁就可食用.



好地方

今晚沒有玩煮飯仔, 因約咗好朋友一齊去十下十下, 我地去試了 Hipot 火鍋店, 食物質素及價錢都好OK, 有唔會限定時間, 可以好舒服慢慢傾慢慢食. 正呀!

 

抵買貨品!!!

嘩! 好熱鬧呀! 好多人呀! 排隊俾錢條人龍好長呀!

以上情景係我今日同 Honey 在 "永安百貨" 見到現象, 由 16/10 - 20/10 是永安 "酬賓特賣日" 而今天係它們酬賓特賣日最後2 天, 看見到處人山人海場面, 每櫃位都堆滿人, 又見到貨品折扣由  10% - 60% 不等. 再加上今天係週六, 所以過場迫滿晒人. 連我地都買咗個行李喼.

  

 

"冧飽" 小禮物

你們要先求祂的國和祂的義, 這些東西都要加給你們了

(馬太福音 6:33)

為何我要分享這節金句, 因同我今日得到 "冧飽" 小禮物有關.

教會嚟緊星期日會有一個粵曲福音佈道會, 而今晚會在教會有唱粵曲的弟兄姊妹來彩排練習. 我本身係佈道部部員當然要回到教會幫手及 briefing 預備星期日佈道會侍奉工作. 但另一方面我亦好想去探一位患未期癌症姊妹的奶奶. 所以我就一放工就去探病先, 同這位長者讀聖經及祈禱. 跟住才回到教會睇彩排及briefing.

但天父恩典真係好奇妙又充滿著愛, 當我回到家後(當時已係晚上10:00), 原來 Honey 一早為我預備了一件美味咖啡蛋糕, 當我看見之後真係好開心, 又甜, 又感動. 雖然只係一件小小心意蛋糕, 但好深感受到他對我關注及愛. 而我亦體會到當自己將天父事工放在第一位, 天父是真的會有獎賞給我們. 謝謝天父!

呵呵....................就算食完肥死都甘願呀!  

Welcome

Yeah! 太好喇! 搬家終於完成, 從此這裏就會變成我的新家, 亦係我與大家聚腳地方. 搬家過程中都唔係事事順利架! 有好多function 唔識要慢慢學習, 真係要俾好多心機去研究. 但今天我終於順利完成了. 請大家日後都多多時時入嚟我 blog 留言傾吓計 (我都想認識多d朋友仔), 同埋加入成為 "我的追蹤者" 保持聯絡.



日式料理南瓜蕃茄手打烏冬湯

今晚食湯烏冬, 但湯底係用日式料理, 南瓜及蕃茄煮出嚟, 所以特別清甜, 烏冬同湯都一齊食埋飲埋呢.

材料
南瓜 (半個) (半份做湯底-切粒, 另半份做食材-切片)

蕃茄 (4 個 - 切件), 雞件 (6 件), 蝦仁 (120 g)
大白菜 (半個), 魚蛋 (6 粒), 獅子狗魚蛋 (3 條 - 每條切 3 件)
稻庭手打烏冬 (3 個)

醃料

雞件: 生抽 (2 茶匙), 糖 (1 茶匙), 鹽 (半茶匙)

紹興酒 (半茶匙), 麻油 (半茶匙)

蝦仁: 鹽 (少量), 胡椒粉 (少量)

湯底調味料

日式鰹汁粉 (2 包), 味噌醬 (1 大茶匙)

南瓜 (切粒), 蕃茄 (切件), 水 (一大鍋)

做法
1) 雞件及蝦仁都清洗乾淨, 抺乾水份, 各自用醃料醃約20分鐘.

2) 南瓜, 蕃茄及大白菜清洗乾淨, 切件及切片, 備用.

3) 燒熱一鍋滾水, 加入湯底調味料煮約20分鐘, 下少量鹽調味.

4) 加入雞件, 蝦仁, 大白菜, 魚蛋, 獅子狗魚蛋及南瓜(切片)煮熟, 再下稻庭手打烏冬煮 2分鐘, 就可熄火盛起食用.

 

製作中湯底

 



菜心炒牛柳

 菜心炒牛肉係我 Honey 至愛小菜之一, 怎麼可能唔識煮呢. (就算唔識都要學到識呀!) 不過, 要煮得好呢個小菜, 食材係好重要. 靚牛柳+清甜菜心係煮呢個餸靈魂食材.

材料

牛柳 $25 (切片), 菜心 (1 斤), 紹興酒 (1 茶匙-贊酒用)

鹽 (1/2 茶匙), 糖 (1/2 茶匙)

 

醃料

生抽 (1 茶匙), 糖 (1/2 茶匙), 粟粉 (1/2 茶匙), 麻油 (適量)

做法

1) 牛柳切薄片, 用醃料醃約15分鐘. 燒熱平底鑊落油, 加入牛柳炒至七成熟. 盛起備用.

 

2) 再下少許油, 加入菜心炒勻, 贊酒, 鹽及糖炒熟, 最後加入牛柳一齊兜勻, 熄火盛起享用.



蠔汁薯仔炆豬腩肉片

今日看了大少奶 Facebook 留言, 知道她有了身孕, 好為她開心, 其實我同她一點都不熟, 只係一個經常會看她文章普通blog友, 但仍會好為她開心. 求主保守她懷孕過程一切平安, 天天有胃口食嘢又心境開朗, 順利生一個可愛BB.

昨晚食了西餐, 今晚就煮了一個中菜, 好普通中菜, 但送餸一流.

材料

薯仔 (1 個-切片), 豬腩肉片 (1 包), 蒜頭 (4 粒-切粒)

醃料
生抽 (1 湯匙), 糖 (1茶匙), 紹興酒 (半茶匙)
油 (半茶匙), 生粉 (半茶匙)

調味料
蠔油 (1 1/2 湯匙), 紹興酒 (贊酒用), 鹽 (少量)
糖 (1 茶匙), 暖水 (1 碗)

做法
1) 清洗乾淨豬腩肉片, 抺乾水份, 用醃料醃約 20分鐘.

2) 薯仔去皮, 切片, 未煮之前用水浸住.

3) 燒熱平底鑊落油, 下豬腩肉片煮至變微黃色, 盛起隔油備用.

4) 再燒熱平底鑊落油, 下蒜頭爆香, 加入薯仔炒香, 贊酒, 下蠔油及暖水, 加蓋轉小火煮 5分鐘, 下鹽及糖調味, 加入豬腩肉片炒勻, 就可盛起享用.

麻辣腐乳蒸雞翼

今晚用了一樽在超市買四川麻辣腐乳來玩煮飯仔. 但我覺得無乜麻辣味, 只有少少辣味, 連我那位不喜歡食辣 Honey 都話食到. 雖然唔麻辣, 但味道係OK 架, 所以都想大家分享, 因為無論好味與否都係我用心製作.

材料

雞翼 (8 隻), 雲耳 (約15-20 塊)

醃料
四川麻辣腐乳 (4 樽-剁爛), 鹽 (半茶匙), 生抽 (1 1/2 湯匙)
老抽 (半湯匙), 薑汁 (1 湯匙), 糖 (1 1/2 茶匙)
油 (半茶匙), 生粉 (半茶匙)

做法
1) 雞翼清洗乾淨, 抺乾水份, 先用鹽醃30分鐘, 再下其它醃料醃約 20分鐘.

2) 雲耳浸水, 待發大, 剪去雲耳底部硬塊. 瀝乾水份, 與 (1) 一切撈勻醃住.

3) 將已醃雞翼及雲耳放入蒸鑊中, 蒸15 分鐘, 就可盛起食用.

 

印度烤豬肋骨

今日一天假期, 大家有什麼活動呢?

我就做吓家務, 陪Honey 幫教會一位姐妹 set up 電腦線路, 跟住就回家預備晚餐, 及宜家繼續努力將舊 blog 文章搬過嚟新blog. 其實真係唔係做咗好多嘢, 但d時間唔知點解好快就過去.明日又要返工啦!!!

講番今晚晚餐主角: 印度烤豬肋骨. 而且還伴了意式黑醋鮮果沙律及蒜蓉飽.

 

材料
豬肋骨

醃料
印度燒烤醬 (2 1/2 湯匙), 乳酪 (1 1/2 湯匙), 黃薑粉 (1 茶匙)

做法
1) 清洗乾淨豬肋骨, 抺乾水份, 用醃料醃約 1 小時以上.

2) 預熱焗爐220度, 將豬肋骨放入焗盆內, 用錫紙住蓋住放入焗爐焗 25分鐘.

3) 然後打開錫紙, 調較焗爐180度焗 8分鐘.

4) 再反轉豬肋骨焗 5分鐘.

5) 然後再反轉豬肋骨, 調較焗爐 220 度焗 8分鐘, 就取出, 待10分鐘後切件, 伴與意式黑醋鮮果沙律及蒜蓉飽一齊享用.

賜平安的神

Hi! 大家好! 我返嚟啦!

由前幾日食瀉藥做身體檢查到現在已有4日了, 當中除了檢查身體, 亦有一些教會服侍要參與, 加上這幾天忙碌, 真係有點疲累. 所以到現在才有時間再寫blog.

好想同大家分享今次身體檢查時所經歷到上帝保守帶領何等美好的事情.

1) 9/Oct 晚上開始就食第一劑瀉藥不久, 好快就瀉清晒, 及一覺睡到天光, 不會好辛苦, 感謝主!

2) 10/Oct 第二天我們決定早點到醫院才食第二劑瀉藥(是的, 共要食2劑), 因為若要瀉都可以在醫院解決, 避免了去醫院途中要找洗手間煩惱. 當我食完瀉藥不久就同Honey一齊祈禱, 求主保守整天檢查一齊順利及平安. 當我們祈完禱將開眼睛時, 就看見一位早前在教會癌關團契認識院牧, 她上前來問我們為什麼這麼早在醫院出現, 當她知道原因後, 她表達對我們關心及表示會為我們祈禱. 其實最令我感動是她的出現正正表達了讓我知道上帝是知道我境況, 上帝是會與我同在, 祂必定會保守我及賜給我平安, 感謝主!

3) 當我稍後上到病房, 姑娘就告訴我知會照胃鏡及腸鏡, 這消息對我嚟講真是一個好消息, 因我一直以為只會照腸鏡. 其實我一直好盼望同時間做胃鏡及腸鏡, 感謝主!

4) 在病房等待去檢查共等候了接近5個小時, 但其間我一點都不肚餓及口渴(檢查是規定不准飲食), 而且內心好平安, 仲睡了添, 感謝主!

5) 在進行檢查時只會局部麻醉, 所以會知道整過過程, 那時我就唱起詩歌來, 讚美主及信靠主帶領. 因此我內心好平安, 感謝主!

6) 檢查亦好快完成就推我回病房休息, 但其間仍不何進食及飲水, 但我一點都不肚餓, 兩個小時後姑娘派了一個愛心飯盒給我充飢. 然後就辦理出院手續回家休息, 感謝主!

在整個檢查過程中好感受到上帝是一直都與我同在的真神, 而且我還有一班好好弟兄姊妹天天默默為我及Honey 祈禱. 令我們好感受到上帝的大愛.

上帝, 謝謝祢愛我, 保守我, 賜下平安給我. 唯獨只有祢獨一真神才能使我有平安喜樂, 阿門!



今晚主菜

介紹今晚主菜給大家認識, 就係 "瀉藥"  啦!

因為我明早要入院做一個照腸鏡檢查, 所以今晚好不情願食咗小小白粥, 就開始食 "瀉藥", 然後就等............!!!

 

除了今晚呢劑, 明日一早仲要食多一劑, 唔........就當Keep Fit啦啦!



Bear Bear@K11

K11 商場最近展覽了一批可愛 Bear Bear 熊公仔, 是 Agnes b Cafe 提供, 它們再身上穿了不同造型衣服, 文字或圖畫, 影了相片宜家同大家分享. 有時間都可以去參觀影靚相.