紅酒燴牛尾

新年蒙福! 首先再次祝大家身體健康, 開煮大吉大利, 大家都煮到更多美味好餸給你至愛家人及伴侶. 今年係我首日開爐, 我嘗試煮了一個紅噹噹 "紅酒燴牛尾" 我同老公都 Like, 但仍有好多可以改善空間, 例如賣相不夠靚靚, 下次再煮我要做得更好!!!

 

材料

牛尾 (6 - 7 件), 蕃茄 (2 個 - 切小粒), 西芹 ( 4 - 5 條 - 切小粒)

紅蘿 (1 條 - 切小粒), 洋蔥 (1 個 - 切小塊), 紅酒 (約 250 ml)

茄膏 (2 - 3 茶匙), 香葉 (3 - 4 片)

乾香草 (1 茶匙 - *因買不到新鮮香草, 如能用新鮮香草會更好)

牛肉湯粒 (1 粒), 冰糖 (少量), 牛油 (少量)

暖水 (約 600 - 800 ml)

 

做法

1) 用清水洗乾淨牛尾, 抺乾備用. 燒熱平底鑊落少許牛油. 加入牛尾煎至表面金黃色, 盛起備用. 另清洗乾淨洋蔥, 紅蘿白, 西芹, 蕃茄, 切小粒備用.

 

2) 燒熱深鍋下少許牛油, 下洋蔥炒至軟身, 加入紅蘿白, 西芹, 香葉及蕃茄炒香, 再加入牛尾炒勻, 下紅酒, 茄膏及暖水, 當水再滾起時加入牛肉湯粒及冰糖, 轉細火炆 30分鐘, 熄火焗 20 分鐘, 再開火當水滾起時轉細火炆 30分鐘, 熄火焗 20 分鐘, 再開火加入乾香草, 當水再滾起時轉細火炆 30分鐘, 然後下鹽調味煮一陣熄火就食得喇!

 

 

愛心小貼士

1) 有教會姐妹教我若想賣相靚 d, 可以在最後炆十五分鐘時先加上蕃茄, 就會令碟牛尾更色香味俱全.

 

2) 用新鮮香草會令香味更香濃.
3) 炆煮時要留意汁料會否收乾晒, 若果有要加番暖水.