2013年11月30日 星期六

木瓜無花果龍眼肉雪耳糖水

今晚 Honey 公司有飯局, 我就約奶奶去食飯及欣賞聖誕燈飾, 我地去咗尖沙咀海港城睇迪士尼卡通人物為主題燈飾佈置. 回到家就食了一碗暖笠笠愛心糖水. 這個糖水是奶奶日間時煮的. 真係好窩心又滋潤.
 
 
 


2013年11月29日 星期五

清炒菜心苗

大家今晚都食咗菜未呀? 食得多唔多呀?

現在好多嬰兒奶粉廣告, 都好強調 BB 要有均衡營養. 但我地大人或小朋友其實都好需要注意均衡飲食. 現在營養學家都話食蔬菜對我們身體健康好重要. 蔬菜含大量膳食纖維, 能保護腸道健康及促進腸道蠕動.

我家每餐飯餸當中, 必定只少會有一碟蔬菜. 無論係 "炒菜" 或 "灼菜" 都必定要有. 今日就同大家分享一碟簡簡單單, 又健康, 又好好味 "清炒菜心苗"

材料
菜心苗 (1 斤), 薑 (3 片), 蒜頭 (4 粒 - 切碎)

調味料
紹興酒 (1 茶匙 - 贊酒用), 鹽 (2/3 茶匙), 糖 (2/3 茶匙)

做法
1) 清水清洗乾淨菜心苗, 備用.

2) 燒熱鑊落油, 爆香薑片及蒜蓉, 加入菜心苗炒勻, 贊酒, 下鹽及糖調味炒勻.  再兜炒一會熟透就可盛起食用.
 
 
 
 
 

2013年11月28日 星期四

聖誕靚景@i SQUARE

昨晚去 isquare 錦丼鮪專門店食完日本菜之後. 我地係商場行咗一陣, 影咗幾幅聖誕佈置相片又同大家分享一下.








 

2013年11月27日 星期三

錦丼鮪專門店@isquare

今晚去剪頭髮扮靚靚, 跟住去咗 isquare 錦丼鮪專門店食日本菜. 這間日本餐廳在 isquare 已經開了有好幾年以上,但始於未曾試過. 我好喜歡它店舖裝修好有日本 free. 這也是吸引我地方之一. 店內設計亦好有日本味道, 讓妳有一種正置身在日本一樣感覺.

它們食物主打新鮮吞拿魚, 及提供壽司和小食, 由日本築地運送到香港.

我同 Honey 點了兩款食物, 一個是軍艦壽司, 另一個是丼飯. 說真, 刺生味道及新鮮度都係一般,我食的軍艦壽司, 嗰紫菜一點都不乾脆, 感覺已放置好耐不夠新鮮, 而且唔係即叫即做. 是不是我地點的食物太普通所以質素係差d. 但作為一間專門店其品質是否應該都要有好保證呢!

我結論是 "試過一次已經足夠了"









 
 
 

豉椒菜脯炒鮮魷

 
今晚由返工忙到夜晚, 連玩煮飯仔時間都無, 宜家已經好眼瞓又好攰, 就請大家睇住我之前煮過又寫過文章同大家分享吓先.
 
材料
菜脯 6 - 7 條 (切粒), 鮮魷 1 隻 (切件), 豆豉 1 湯匙 (剁碎)
指天椒 4 - 5 隻 (切小粒), 蒜頭 4 粒 (切碎), 乾蔥 3 粒 (切碎)
 
醃料
鹽, 胡椒粉 (各適量)
 
做法
1) 鮮魷清洗乾淨切件, 放入滾水中汆水一陣, 撈起用醃料醃約15分鐘.
 
2) 燒熱鑊落油, 下蒜蓉, 乾蔥, 豆豉及指天椒爆香, 加入菜脯炒勻, 再下鮮魷兜勻, 加入適量滾水加蓋煮約 2-3 分鐘就熄火盛起享用.

 
 

2013年11月26日 星期二

蠔肉伴金菇菜

我本身唔係一個經常會煮蠔的人, 所以因著技術有限, 我煮呢個餸係分開蠔肉及金菇菜來煮, 咁就唔怕會失手. 這款韓國蠔肉雖然唔係好大隻, 但好有蠔味, 用少少調味料就能帶出蠔肉鮮味.

材料
韓國蠔肉 (1 包), 金菇菜 (1 包), 薑片 (3 塊), 蒜頭 (2 粒 - 切碎)

調味料
韓國蠔肉 - 蠔油 (1 大茶匙), 鹽 (少量), 糖 (1/2 茶匙)
紹興酒 (1 茶匙 - 贊酒用), 暖水 (3 - 4 湯匙)

金菇菜 -  蠔油 (1/2 湯匙), 鹽 (少量), 紹興酒 (1 茶匙 - 贊酒用)

做法
1) 蠔肉用粟粉清洗乾淨, 汆水 (只需1分鐘), 盛起隔水備用.

2) 金菇菜清洗乾淨, 燒熱平底鑊落油, 下蒜頭爆香, 加入金菇菜炒勻, 贊酒, 下調味煮熟, 盛起放碟上.

3) 燒熱平底鑊落油, 下薑片爆香, 加入蠔肉煎炒, 下蠔油, 鹽及糖調味, 下暖水兜勻煮熟, 就可盛起平排在金菇菜上.

 


2013年11月25日 星期一

My love, 生日快樂!

今日是我姨甥仔畯烶 4歲生日, 我地一家人同他去咗意粉屋食晚飯, 食生日蛋糕. 當然還有送上生日禮物啦!

祝願你天天健健康康, 開心快樂成長, 一天比一天更愛天父. 天父及我們一家人永遠都愛你.
 
 


2013年11月24日 星期日

青紅蘿蔔粟米西施骨湯


趁假期煲咗個非常簡單又夠正氣湯水, 清甜滋潤, 在這個秋冬為我一家帶來温暖.

材料
紅蘿蔔 (1 大個 - 切粒), 青蘿蔔 (1 個 - 切粒)
粟米 (2 條 - 切半), 蜜棗 (5 粒), 西施骨 ($40)

做法
1) 西施骨清洗乾淨, 汆水, 盛起備用.

2) 用氣壓煲燒滾一鍋水後, 加入以上所有材料, 然後蓋上氣壓煲蓋, 當氣壓煲開始加壓, 就調較細火煲 30分鐘, 然後熄火待減壓, 當減壓完後開氣壓煲蓋, 改用玻璃煲蓋再煲15分鐘加鹽調味就可飲用.
 






聖誕靚景@K11

今日到了尖沙咀 K11 商場 Shopping, 順道影吓商場聖誕佈置同大家分享. 我最喜歡它們每層掛在玻璃上燈飾串串, 好Sharp好美麗, 令商場好有聖誕美感. 商場外圍空間都比較大, 放置了好美麗聖誕花襯托著綠葉及樹木, 感覺好舒服.

 
 





 


2013年11月23日 星期六

高貴 Earl Grey Tea 英式紅茶

上星期日在我家愛筵中有位姐妹送了我一盒她剛從英國買回來的 FORTNUM & MASON "Earl Grey Tea" (格雷伯爵茶).

我本身對英式紅茶無太大興趣, 亦唔係一位品茶專家. 因為我以前嘗過的紅茶都帶有好濃 "澀味" 我不太欣賞. (或許我以往飲的都係一些品質好差劣紅茶)

但今次我嘗過這款由 1707 年起就生產傳統英式貴族紅茶之後, 我就改觀了. 味道好芳香濃郁, 不會有 "澀味", 還有一種淡淡香草味, 雖然我唔知道這香草味是什麼香草, 但真係好好味, 及有一種好舒服休閒感覺, 好想再繼續飲及細細品嚐. 宜家我明白點解d貴族都鍾意嘆紅茶啦!




我上網揾咗一些關於 "Earl Grey Tea" (格雷伯爵茶) 資料同大家分享一下.

格雷伯爵茶(英語:Earl Grey tea)是以中國正山小種或錫蘭紅茶等優質紅茶為基茶, 加入香檸檬油的一種調味茶. 格雷伯爵茶是當今世界最流行的紅茶調味茶, 也是「英式下午茶」的最經典飲品.

格雷伯爵茶是以十九世紀初英國首相格雷二世伯爵為命名的.敦寧商店(Twinings)是格雷伯爵茶的實際創製者. 據說格雷伯爵茶源於清朝一位福建華人對格雷伯爵的贈禮. 當時格雷伯爵收到的禮品茶飲料非常受歡迎, 當茶被用完時,格雷伯爵要求茶商川寧仿製這種調味茶並供應他的首相官邸(10 Downing Street). 然而很多伯爵的訪客非常喜歡這款茶, 伯爵就會告訴他們在川寧購買格雷伯爵訂製的茶, 後來這款調味茶就以 "Earl Grey Tea" 為名了.

2013年11月22日 星期五

聖誕靚景@將軍澳中心

昨晚去了將軍澳中心商場行吓街街, 食吓 Dinner, 見到今年它們聖誕佈置都幾靚又別緻, 以聖誕 "馬"為主題. 雖然聖誕佈置場景不是好大. 但聖誕節喜氛好濃厚. 影咗一些相片同大家分享. 有時間大家都可以去睇吓影張靚相.

 







2013年11月21日 星期四

腐竹白果芝麻湯丸糖水

一頓豐富晚飯後, 再來一個滋潤糖水就 Very Sweet.
上星期日愛筵中就為我主內弟兄姊妹預備了一個窩心糖水.
不如妳/你今晚都煮過滋潤糖水同妳/你家人朋友一齊分享喇!

材料
白果 (2 包), 腐竹 (2 包), 芝麻湯丸 (9 粒)

調味料
冰糖 (份量隨個人喜歡甜度)

做法
1) 白果清洗乾淨, 腐竹清洗乾淨, 備用.

2) 燒一鍋熱水, 下白果細火煮約 15分鐘. 再加入腐竹煮至溶化. 下冰糖調味, 最後加入芝麻湯丸煮熟就可食用.
愛心提示
1) 當下腐竹煮時要經常睇火留意免煮到滾瀉.

2) 我係買已去殼真空包裝白果, 好處是不用去殼, 簡單方便.

2013年11月20日 星期三

BBQ 雞脾

昨晚 Honey 要工作, 未能回家食飯, 就同囡囡食了一頓好簡單晚餐 (BBQ雞脾及蒜蓉包), 雖然話好簡單但都是好用心製造了一個用 BBQ 燒烤醬做的雞脾. 香噴噴香料及嫩滑多汁雞脾肉, 再加埋青檸汁, 真係 Very Good!

材料
雞脾 (5 隻), 青檸檬 (1 個)

醃料
海鹽 (1 茶匙), 生抽 (1 湯匙), 黑胡椒粉 (2 茶匙), 白酒 (1 湯匙)
BBQ 燒烤醬 (3 湯匙), 乾迷迭香 (1 湯匙)

調味料
BBQ 燒烤醬 (約 2 湯匙), 青檸檬 (1 個 - 榨汁)

做法
1) 將雞脾解凍, 清洗乾淨, 抺乾水份, 均勻搽上醃料放入雪櫃醃一個整晚.

2) 從雪櫃取出醃了一整晚雞脾解凍, 開焗爐 220 度預熱, 用錫紙包住雞脾放入焗爐焗約 23 分鐘.

3) 然後拿開蓋面錫紙, 調較焗爐 200度, 在雞脾表面均勻搽上一層 BBQ 燒烤醬放入焗爐焗 8 分鐘, 反轉背面再搽一層 BBQ燒烤醬再入焗爐焗 8分鐘, 之後用蜜糖均勻搽在雞脾上調較焗爐用 220 度火力焗 8 分鐘, 然後從焗爐取出雞脾靜止約 10 分鐘, 就可盛起食用, 亦可以灑下青檸汁在雞脾上食用.



Related Posts Plugin for WordPress, Blogger...