2012年9月30日 星期日

木瓜雪耳湯圓糖水

今天是中秋節, 人月團圓大好日子. 妳/你係咪同家人或好友一齊慶祝緊呢? 今日我都度過了一個好特別中秋節. 早上返教會崇拜,下午參加了一對弟兄姐妹婚禮, 而且在當中能為她們讀經, 實在好開心又感恩. 願妳們一生一世都甜蜜幸福直到永遠.

今日就同大家分享一個同中秋節有關甜品 "木瓜雪耳湯圓糖水".

祝各位, 中秋節團團圓圓! 甜甜蜜蜜!

材料
雪耳 (2 個), 木瓜 (1 個), 南北杏 (少量)
芝麻湯圓 (份量隨大家), 冰糖 (隨個人口味)

做法
1) 將雪耳浸水, 雪耳發大後剪去硬身, 撕成小塊.

2) 木瓜去皮去核, 切成小塊.

3) 煲一鍋滾水, 加入雪耳, 木瓜及南北杏, 當水再滾時轉細火煲約 45分鐘, 然後加冰糖試味.

4) 再加入湯圓, 見湯圓浮面及漲大, 就可盛起, 一路賞月一路食用喇!



2012年9月25日 星期二

糖醋骨

 
材料
一字排骨(金沙骨) 約 1 斤
 
調味料
紹興酒 (1 湯匙), 生抽 (2 湯匙), 白糖 (3 湯匙)
鎮江醋 (4 湯匙), 水 (5 湯匙)
 
做法
1) 先清洗排骨, 放入沸水中拖水, 撈起備用.
 
2) 用一個鍋放入所有調味料煲滾, 然後加入排骨, 當水再滾時就轉細火炆煮約 1 小時或見汁收乾, 就可慢慢享用.
 
 
愛心小貼士
買排骨千萬唔好揀太瘦, 要揀帶有少少肥膏部份, 炆煮出嚟先淋身好味架!


2012年9月23日 星期日

土茯苓昆布海草瘦肉湯

 
今日完了崇拜同弟兄姐妹一齊Lunch. 順便問下大家這季節煲咩湯水好呢. 有位弟兄講佢話用生地, 熟地, 昆布, 海草, 瘦肉煲湯可以對皮膚敏感有幫助. Honey 時不時就話皮膚痕, 我就去咗藥材舖買材料, 店舖亞姐介紹我買這湯包: 野牛皮止痕湯. 煲出嚟這個湯雖然好深色, 但好清甜架.
 
功效
潤燥止痕, 袪濕涼血, 清熱解毒, 消痰散結
 
材料
湯包 - 土茯苓, 昆布, 海草, 大生地, 野牛皮, 瘦肉 ($20)
 
做法
1) 瘦肉清洗乾淨, 放入沸水中拖水, 撈起備用.
 
2) 將湯包所有材料洗淨.
 
3) 用湯煲煲滾水, 加入瘦肉及湯包材料, 待水滾後轉細火煲 2-3小時, 加入鹽調味, 即可慢慢飲用.
 


2012年9月21日 星期五

Sweet Friday Night@尖沙咀 Suzuki Cafe

呢兩日公司有同事去咗旅行, 要負責埋佢工作因此多咗好多嘢做. 好忙好攰!!! 所以今晚同Honey 去尖沙咀海旁行吓 Relax 吓. 少少涼風吹拂沿途又有海景睇, 真係好舒服. 後來去到海運大廈 Honey 話不如去3樓 LCX 行吓, 上到去我地發覺唔同在好多 (我地差不多有成1年幾無去過喇!) 宜家多咗好多小型但有好in年青品牌店舖. 行吓望吓見到間 Suzuki Cafe 見到佢有一個 2 人套餐 $248 (包湯 + 頭盤 + 2 個主菜 + 甜品 + 餐飲) 覺得價錢都Ok, 而且有海景位, 環境氣氛都好浪漫. 食物水準都不錯, 又夠熱, 份量都不會太細, 二人食都夠飽肚.

餐湯: 甘荀忌廉湯
4

頭盤: 南瓜松子仁沙律/ 牛油煎餃子/ 照燒雞翼

 自己杯餐飲 + $28 轉了杯 "蜜糖鮮奶抺茶" 及Honey 另叫了一支礦泉水
 
 主菜 1: 松露野菌櫻花蝦比薩
 
 主菜 2: 沖繩温泉蛋蒜香豚肉熱鍋飯

 Honey 餐飲: 特濃咖啡
甜品: 迷你鮮果橽

整體上來講我地都好滿意,而這間Cafe 環境除了適合情侶,也適合成班朋友一齊去食飯傾計架。

2012年9月20日 星期四

三杯雞

 
"三杯雞" 這個食譜係我舊年睇 "簡易食譜" 見到,當時已經好想嘗試煮呢個餸, 但後來唔知攪咩就忘記呢件事, 上星期無意中又在睇到食譜, 就下定決心一定要煮. 唔........果然味到不錯! 今次我仲加多咗乾蔥及蒜頭, 等煮出嚟香味更濃郁.
 
材料
雞 (1 隻 - 斬件), 乾蔥 (5 粒-切片)
蒜頭 (4 粒-拍扁), 薑 (3 塊-拍扁)
 
調味料
生抽 (2 湯匙), 老抽 (2 湯匙), 冰糖 (2 湯匙-舂碎)
紹興酒 (2 湯匙), 麻油 (2 茶匙), 暖水 1 杯 (約 250ml)
 
做法
1) 清洗乾淨隻雞, 斬件. 如果是雪藏雞就要放在滾水中拖水先, 去血水及雪味.
 
2) 燒熱鑊落油, 下薑, 乾蔥及蒜頭爆香, 聞到香味就加入雞件一齊炒勻.
 
3) 見雞件表面轉色就下調味料撈勻, 加蓋大火煮滾後轉細火炆約 20-30 分鐘或雞件軟身, 汁料收乾, 就可以熄火慢慢享用.
 



2012年9月19日 星期三

謝謝歡迎嚟過Blog 友

 
好嘢! 哈哈..........哈哈.......太開心! 今日我 Yahoo Blog 已經累積瀏覽人數有 2000 人. 實在太開心. 雖然不是一個好大數目, 但對我來講, 實在太開心又感動. 感謝主! 也多謝各位對我支持願意快時間去睇我寫d無為嘢(因我的文筆實在大差勁). 願我日後繼續有這份動力繼續寫Blog. 希望大家繼續支持我.
 
 


2012年9月18日 星期二

南瓜椰菜花

 
哈哈........今晚煮飯仔又係由 "南瓜" 做主角. 無辨法我太愛南瓜喇!
而且南瓜含有豐富維他命C及胡蘿蔔素,對人體健康是很有幫助.
 
材料
南瓜 (約 $8 - 切件), 椰菜花 (1 個)
 
調味料
鹽 (1/4 茶匙), 日式豉油 (1/4 茶匙), 味醂 (1/4 茶匙)
 
做法
1) 南瓜去皮切小件, 椰菜花洗淨切件, 放入滾水中(加鹽) 拖水約 3分鐘。撈起瀝乾水份備用.
 
2) 燒熱鑊落少許油, 下南瓜炒, 加滾水加蓋煮一陣 (見水收乾或南瓜開始淋淋地.
 
3) 下椰菜花一起炒勻, 加入調味料煮約 2分鐘就食得喇.
 
 

2012年9月17日 星期一

三文魚紅白蘿蔔湯

昨天諗住去超市買餸玩煮飯仔, 經過大昌就入去行吓. 嘩! 見到好大包三文魚骨腩都只係 $13.10 好抵呀! 我就問 Honey 想唔想飲三文魚湯, 佢當然 Like 喇! 結果我就帶在三文魚骨腩返屋企一齊玩煮飯仔. WoW! 加埋紅/白蘿蔔一齊煲, 好鮮味又清甜.

三文魚營養價值好高. 三文魚是高蛋白 、低熱量的魚類食物 。含有多種維他命及礦物質。此外三文魚含有最多的Omega-3 、不飽和脂肪酸.

Omega-3 能有效地降低膽固醇 ,保護心臟 。豐富的 Omega 3有助兒童眼部發育 ,及對腦部發展有一定幫助.

材料
三文魚骨腩 (1 包), 紅蘿蔔 (1條-切件), 白蘿蔔 (1 條-切件)
薑 (3-4 片), 鹽 (少許)

做法
1) 三文魚骨腩去魚鱗, 洗乾淨抺乾水份.

2) 紅/白蘿蔔去皮切小件備用.

3) 燒熱平底易潔鑊下少許油及薑, 加入三文魚骨腩細火慢慢煎至兩面微黃.

4) 放入一煲滾水中煲出奶白色湯水. 並加入紅/白蘿蔔, 待水再滾起就轉細火煲1小時以上, 加鹽調味熄火就可享用.
呢包三文魚骨腩係咪好大包呢?
愛心小貼士
煎三文魚骨腩其實下好少油去煎就OK, 因本身煎時它都會出頗多油.

2012年9月14日 星期五

橙汁豬排

好耐之前煮過一次橙汁肉排俾 Honey 食, 佢就時時叫我再煮多次俾佢食, 仲話叫我轉用豬排代替肉排. 好喇! 你既然咁鍾意我就偉大d成全你. 食後我老公話OK, 但講真我都係覺得用肉排去煮好味d.
材料
豬排 (4 塊 - 每塊切開一半), 薑蓉 (1 湯匙)
蒜蓉 (1 湯匙), 白酒 (2 茶匙)
醃料
鹽 (半茶匙), 生抽 (3/4 湯匙), 糖 (半茶匙)
蛋液  (1隻雞蛋), 生粉 (3 - 4 茶匙)
汁料
鮮榨橙汁 1 杯 (約250 ml), 雞湯 1 杯 (250 ml), 生抽 2 湯匙
黃糖 (raw sugar) (1 1/2 湯匙), 橙皮蓉 (只橙色部份) (2 湯匙)
冰糖 (少許)
做法
1) 洗乾淨豬排抺乾淨水份, 用刀背拍鬆, 將豬排用醃料醃10 分鐘, 然後用平底鑊開中小火將豬排煎至微黃色盛起.
2) 在同一個鑊下少許油加入薑蓉, 蒜蓉及白酒, 將豬排回鑊快手炒勻.
3) 用一個鍋倒進汁料開火煮滾, 然後加入豬排, 當汁料再滾後就轉細火煮約 30分鐘或汁料減到約1/5呈深色濃稠就OK.


2012年9月11日 星期二

日式醬汁南瓜

 
我愛南瓜! 我愛南瓜! 我愛南瓜!
 
由我開始學煮飯仔, 南瓜就係必會常煮食物, 佢味道甜美, 樣子可愛, 顏色感覺好有朝氣活力
(見到佢就好似見到太陽伯伯或向日葵)
 
今次我用南瓜煮一道日本餐前小食, 其實用佢嚟做主菜餸飯都得架!
 
材料
日本南瓜 (1/4 個 - 切粒)
 
調味料
日本豉油 (2 湯匙), 味醂 (1 湯匙), 砂糖 (1 茶匙)
鰹汁粉 (1 包), 水 (約 250 ml)
 
做法
1) 煲滾熱水加入調味料及南瓜撈勻轉細火加蓋煮 15 - 20 分鐘.
 
2) 熄火焗 10 分鐘就食得喇!
 



2012年9月9日 星期日

印度烤雞腿

 
材料
雞腿 (3 隻)

醃料
印度燒烤醬 2 湯匙 (我係用 " Patak's" Tandoori Paste)
鹽 (少許) (因本身燒烤醬都咸咸地)

做法
1) 洗淨雞腿, 抺乾水份, 用鹽 + 燒烤醬撈勻雞腿, 放入雪櫃醃一晚.

2) 從雪櫃取出雞腿解凍, 焗爐預熱 200 度, 將雞腿放在烤架上焗10分鐘. (醬汁留用)

3) 跟住取出烤雞腿反轉搽上醬汁180 度焗 8分鐘, 再反轉搽上醬汁再焗8分鐘.

4) 再反轉200 度焗 5分鐘 (主要係要焗得乾身d), 然後熄焗爐靜止5分鐘取出. 配上檸檬汁享用.
 
 印度燒烤醬 (除了烤雞, 還可以烤羊 or 其它肉類相信都好好味)
愛心小貼士
每款焗爐火力都不同, 烤焗時大家都要留意火力, 免得焗焦.


2012年9月8日 星期六

金柚南瓜露

 
材料
日本南瓜 (1/2 個), 鮮奶 (約 3/4包)
金柚肉 (1/2 個 - 隨個人喜愛多少)
砂糖 (隨個人口味) 我自己就無加
 
做法
1) 將南瓜去籽, 用鑊隔水預熱將南瓜放在蒸架上蒸約15 分鐘.
 
2) 然後起肉加入清水煮至淋身. (其實不用煮太耐, 因之前己蒸了一陣, 只要淋身就得.
 
3) 放涼, 倒入攪拌機攪成糊狀.
 
4) 加入鮮奶再煮滾後加糖試味, 食時放入金柚肉就可享用.


2012年9月7日 星期五

燒烤汁焗豬肋骨

西餐廳 "燒烤豬肋骨" 係我至愛食物之一, 在多年前食過 TonyRoma's 原味燒烤醬豬肋骨便愛上了. 所以豬肋骨係我其中一項好想學識煮的美食. 今次我鍾意成功喇!

材料
豬肋骨 1 條 (份量視乎隨個人喜歡, 今次我買 $55)
原味燒烤汁 (約 4-5湯匙), 黑啤 1 罐 (用半罐就足夠)
豉油 (1-2 茶匙), 糖 (1-2 茶匙)
蜜糖 (2-3 湯匙), 乾蔥 (2-3粒-切片)

做法
1) 先將豬肋骨解凍, 洗淨然後抺乾淨水份, 均勻搽上一層豉油 + 糖醃1個鐘

2) 之後落半罐啤酒, 加入約 2湯匙燒烤汁搽勻件豬肋骨,
再放上乾蔥用保鮮袋封住件豬肋骨放入雪櫃醃一晚.


3) 從雪櫃取出醃了一晚豬肋骨解凍, 開焗爐預熱 220 度約10分鐘.

4) 用錫紙包住豬肋骨放入焗爐焗約 20分鐘.

5) 在此期間取 2湯匙蜜糖 + 2湯匙燒烤汁撈勻做成 "蜜糖燒烤汁"

6) 然後拿開錫紙在豬肋骨表面均勻搽上"蜜糖燒烤汁" 再放入焗爐, 每隔5分鐘搽一次"蜜糖燒烤汁" 共搽 4次, 然後熄火讓件骨放在焗爐約5分鐘才取出享用.



2012年9月4日 星期二

紫洋蔥炒翠肉瓜

 
我好鍾意食翠肉瓜, 無論爽口食或淋淋地食都鍾意, 而且不用去皮就可煮食是極之方便. 清炒或配任何肉類都好match. 洋蔥能夠抑制致癌物質的合成,促進吞噬細胞破壞癌細胞,因此有抗癌的作用.
 
材料
翠肉瓜 (2 條-切件), 紫洋蔥 (1-2 個 - 切條), 蒜頭 (4 粒-切片)
 
調味料
鹽 (3/4 茶匙), 蠔油 (2-3 湯匙), 水 (3 湯匙)
 
做法
1) 翠內瓜用滾刀法切件, 紫洋蔥切粗條.
 
2) 燒熱油鑊爆香蒜蓉, 下洋蔥炒勻.
 
3) 加入翠肉瓜一起兜勻, 下調味料及水加蓋煮 5 分鐘就成了.
 


2012年9月2日 星期日

日式料理炆薯仔鴕鳥肉

最近在 blog 上看見了一位 "鬼嫁" 食譜 blog, 她煮日本菜好吸引又簡單. 令我對煮日本菜產生了一份興趣. 本來這個餸她是用肥牛肉做肉類材料. 但因我 Honey話想食得健康d 要我轉用駝鳥肉. 但煮出嚟都好好味!
材料
駝鳥肉 (切片 - 只用了一半份量就OK) (在吉之島有得買)
甘旬 (1 條 - 切大粒), 薯仔 (2 個 - 切大粒)
紫洋蔥 (1 個 - 切粗條), 金菇菜 (少量)
醃料
生抽 (1 - 2 茶匙) , 胡椒粉 (1 茶匙), 麻油 (少量)
調味料
鰹汁粉 1 包 (吉之島有得買), 日本豉油 (2 湯匙), 味醂 (2 湯匙)
料理酒 (2 湯匙), 砂糖 (1 湯匙), 水 (約 200 - 300 ml)
做法
1) 在鍋內加入水煲滾後, 加入鰹汁粉拌勻.
2) 將甘旬及薯仔放入汁內, 待水滾後加蓋轉小火煮8 分鐘.
3) 加入調味料(豉油,味醂,料理酒,砂糖)及洋蔥加蓋小火煮15分鐘.
4) 開蓋加入駝鳥肉及金菇菜加蓋大火煮約3分鐘就完成.


2012年9月1日 星期六

舒服晒! ^^

 
早排太忙及太攰! 好耐都無時間玩煮飯仔喇!! 攪到成日勁手癢!!!!

所以今晚得閒一次過煮了4個餸 + 1 個甜品.
煮完食完成個人都舒服晒! 再無手癢!


哈哈...........我係未好傻呢 ^^

今晚煮愛心飯餸
日式醬汁炆薯仔駝鳥肉
紫洋蔥炒翠肉瓜
燒烤汁焗豬肋骨
三文魚骨蘿蔔湯
飯後甜品 - 金柚南瓜露
 
稍後再send 食譜出嚟 ^^

Related Posts Plugin for WordPress, Blogger...