生炒排骨 (附食譜)

生炒排骨是我好喜愛小菜, 經常都會上餐館點來食, 但自煮這個小菜話易煮又不是, 話好難煮亦不是, 至緊要係炸排骨時間要掌握得好好, 加上酸甜汁調較得好, 煮出來就必定會成功.

上星期六教會朋友來晚飯, 就煮了這個小菜招呼大家, 估不到上菜無耐已好快食清晒. 大家非常喜歡, 真的令我好感動. 應承你們我會繼續努力學煮更多好餸, 來供獻給你們個肚仔喇!  

 

材料

腩排 ($35 - 切粒), 青椒 (1 個 - 切塊), 菠蘿 (3 片 - 切粒)

醃料

生抽 (2 茶匙), 黃糖 (1 茶匙), 麻油 (少量)
胡椒粉 (少量), 生粉 (1 茶匙)

酸甜汁料 (醬汁口味每個人都不同, 請先試味)

白醋 (7 茶匙), 茄汁 (4 湯匙), 片糖 (半磚 - 搗碎), 鹽 (少量)

做法

1) 腩排清洗乾淨, 抺乾水份, 用醃料醃約 30 分鐘, 備用.

2) 青椒清洗乾淨, 去籽及切塊, 備用.

3) 腩排上生粉, 燒熱油, 下腩排用中火炸約 4 分鐘, 盛起隔油. 然後用大火翻炸約 30 秒 (此動作可迫出多餘油份), 盛起隔油.

4) 開火下油, 下青椒煮熟, 盛起備用.

5) 再開火, 下酸甜汁料煮至理想酸甜口味, 熄火, 下腩排, 青椒及菠蘿兜勻, 就可食用了.

請入嚟我 Facebook 專頁按 "讚好" 給我支持啦!