玫瑰鍋@甘筍洋蔥薯仔炆牛肋條 (附食譜)

上星期五我新寵兒愛妃 (玫瑰鍋) 終於都空降到我家, 立刻趁假日就好好親親她 (玩煮飯仔). 愛妃的鎖水功能真係好好, 我只係用咗一罐醬汁 + 同等份量水份 (300 ml) 就能夠炆熟一鍋牛肋條, 又淋又入味. 今次我用 "金寶香甜蕃茄醬" 來炆牛肋條, 非常好味, 我家人都好鍾意. 誠意向大家推介.

玫瑰鍋 26 cm 高 (粉綠色)

材料
牛肋條 (3 條 - 切件), 甘筍 (2 條 - 切件), 洋蔥 (1 個 - 切塊)
薯仔 (1 個 - 切件), 薑片 (3 塊 -汆水用, 2 塊 - 炆煮用)
蔥 (1 扎 - 切段), 蒜頭 (5 粒 - 拍扁), 乾蔥 (2 粒 - 切粒)

調味料
金寶香甜蕃茄醬 (1 罐), 暖水 (300 ml), 冰糖 (1 粒), 香葉 (3 塊)

做法
1) 牛肋條解凍, 清洗乾淨, 切件, 用薑片及蔥段汆水約 3 分鐘, 盛起備用.

2) 玫瑰鍋開中火, 下薑片, 蒜頭及乾蔥爆香, 加入牛肋條煎至微金黃色, 下甘筍及洋蔥兜炒約 3 分鐘, 加入香甜蕃茄醬及香葉拌勻, 再加入冰糖及暖水, 加蓋轉細火炆 30 分鐘, 熄火焗 30 分鐘.

3) 然後開中火加入薯仔拌勻, 再加蓋轉細火炆 30 分鐘, 再熄火焗 30 分鐘, 就成了.


請來我 Facebook 主頁按 "讚好" 給我支持啦!