2013年3月30日 星期六

醉豬手

 
材料
冰鮮豬手 2 磅, 薑 3 - 4 片, 八角 3 粒
糟滷 2 支, 紹興酒 約 1/ 2 杯, 糖 3 - 4 茶匙
冰水 1 盆 (足夠浸住豬手), 水 1 杯 (已煲滾水)
 
做法
1) 洗乾淨豬手, 放在已煲滾熱水中汆水. 盛起用冷水沖洗乾浮.
 
2) 再煲滾一鍋水, 加入薑片, 八角及豬手, 當水再滾起時轉細火煮 2小時.
 
3) 然後撈起豬手放入冰水中,直至所有豬手都冷卻了.
 
4) 用一個器皿或大碗注入糟滷, 紹興酒,水及糖, 調配到適合自己口味, 加入己冷卻豬手, 浸48小時即可享用. 
 
 
愛心小貼士
1) 浸豬手時間可以 24小時都OK, 但我自己比較鍾意浸耐d, 咁就更加入味喇.
 
2) 浸豬手時亦可以加入甜話梅一齊浸, 味道更好呀.



2013年3月27日 星期三

豆瓣醬翠肉瓜炒豬腩肉片


雪櫃裏的翠肉瓜已存放了多天, 加上昨天買了一盒豬腩肉片但有未用過, 今晚我就將它們結合成一對最佳搭擋, 呵呵........果然無令到我失望, 呢對搭擋令到我家奶奶讚不絕口. 我自己亦都極之鍾意.
 
材料
翠肉瓜 1 個 (切粒), 豬腩肉片 1 包
豆瓣醬 1.5湯匙, 蒜頭 6 粒 (切碎), 乾蔥 1 粒 (切碎)
 
醃料
生抽, 糖, 紹酒,油,芝麻油,豆粉
 
做法
1) 翠肉瓜清洗乾淨切粒, 豬腩肉片用清水洗淨抺乾, 用醃料醃約15分鐘.
 
2) 燒熱平底鑊落油, 加入豬腩肉片炒香, 轉微黃色就盛起備用.
 
3) 用同一隻鑊落油, 下蒜蓉及乾蔥爆香, 加入翠肉瓜炒勻, 然後下豆瓣醬兜勻, 加入暖水加蓋煮1-2分鐘, 下糖調味, 再放下豬腩肉片兜勻加蓋煮約 2-3分鐘, 熄火盛起慢慢食用.
 
 


2013年3月20日 星期三

青檸柚子蜜雞翼


好多人都話煮柚子蜜雞翼好好味, 但我一直都無煮到, 原因我唔想再買一樽柚子蜜放在家中, 我屋企已經有太多太多醬料, 曾經被 Honey 投訴話我買得太多醬料, 但某日行超市時 Honey話不如買樽柚子蜜回家飲用或煮餸用, 呵呵.......我當然話好喇! 所以今晚就用佢煮了這個人人都話好好味嘅 "青檸柚子蜜雞翼"
 
材料
雞翼 (12 隻), 青檸 (約 1 個 - 搾汁), 暖水 (約 5 - 6 湯匙)
 
雞翼醃料
糖 (1/2 茶匙), 生抽 (適量 - 不要下太多生抽, 否則好容易煎濃)
 
調味料
柚子蜜 (約 3 - 4 湯匙), 鹽 (1/2 茶匙)
 
做法
1) 解凍雞翼及清洗乾淨, 抺乾淨水份, 用雞翼醃料醃30分鐘
 
2) 燒熱平底鑊落1 湯匙油, 加入雞翼煎至兩面金黃色, 盛起備用.
 
3) 跟住再燒熱平底鑊落1茶匙油, 慢火下調味料, 加入雞翼拌勻再注入暖水, 加蓋煮約3-4分鐘. 然後熄火加入青檸汁拌勻, 盛起享用.
 
 


2013年3月19日 星期二

日式 Sukiyaki 火鍋

唉!................好懶, 非常懶, 由過年到宜家妳都無好好寫過Blog, 妳仲要懶到幾時呀? 唔該妳勤力d喇!!!

相信大家都估到話佢好懶係邊過, 咪就係 "我" 本人囉! 由新年到宜家只係出過兩篇Blog,所以今晚無論如何我都要post 番啲食譜上Blog 先得.

今晚我試整了一個日式 Sukiyaki 火鍋, 係我之前睇過 "鬼嫁" Blog, 然後跟住學整架, 果然簡單又好好味, 只要屋企有 "三寶" 就能做到日式火鍋.

材料: (4 人份量)
肥牛肉 (1 盒), 豬肉片 (1 盒), 椰菜 (1 個), 金菇菜 (2 包)
獅子狗卷 (1 包), 芋絲 (1 盒), 蟹柳 (6 條), 貢丸 (數粒)
水餃 (5 粒), 豆腐 (1 盒), 烏冬 (3 個)

Sukiyaki 火鍋湯底
鰹汁粉 (2 包), 日本豉油 (7 湯匙)
味醂 (5 - 6 湯匙), 水 (約1200 ml)
砂糖 (約 2茶匙, 但我無加到, 因我己經覺得好夠味)

做法
1) 將椰菜及金菇菜清洗乾淨及切件.

2) 用一個鍋加入清水, 當水滾起時加入鰹魚粉, 豉油及味醂拌勻, 然後試試味道是否OK, 跟住加入豆腐及椰菜煮一陣後, 就將鍋子放在電子爐上, 加入其它食材慢慢 "拾下拾下" 享用.
 美味火鍋食物

以下就係日式Sukiyaki火鍋 "三寶" (鰹汁粉, 日本豉油, 味醂)
愛心小貼士
1) 日本豉油及味醂是可以隨個人喜好加減.
2) 記住放食物入火鍋湯之前, 要先試好味道是不是妳自己喜歡濃到才加入食物煮熟.

Related Posts Plugin for WordPress, Blogger...