香芒鴕鳥肉

昨日去街市買餸見到大大個芒果, 就即刻買咗佢預備今晚煮嚟食. 用佢嚟配駝鳥肉very GOOD & MATCH. 我一家人好唔客氣好快同我食清晒喇!

材料

大芒果 (1 個 - 切粒), 駝鳥肉 (1 盒 - 切粒), 蒜頭 (6 粒 - 切碎)

醃料

生抽 (2 茶匙), 糖 (1 茶匙), 胡椒粉 (少量)

麻油 (半茶匙),  生粉 (1 茶匙)

調味料

日式燒肉照燒汁 (1 茶匙), 暖水 (2 - 3 湯匙)

做法

1) 大芒果去皮, 切粒, 用1 小茶匙白醋拌勻, 備用.

2) 駝鳥肉清洗乾淨, 抺乾水份, 切粒, 用醃料醃約 15分鐘.

3) 燒熱平底鑊落油, 下駝鳥肉煎至轉微黃色, 盛起備用.

4) 原鑊再落油, 下蒜頭爆香, 加入駝鳥肉及日式燒肉照燒汁拌勻, 下暖水煮約1-2分鐘, 此時駝鳥肉應該是煮熟了. 熄火, 下芒果用火爐的餘温與駝鳥肉拌勻, 就可盛起食用.



蠔汁薯仔炆豬排

材料

豬排 (3 件 - 剁鬆, 每件切3塊)

薯仔 (3 個 - 切片), 蒜頭 (4 粒 - 切粒)

醃料

生抽 (2 茶匙), 糖 (1 茶匙), 紹興酒 (半茶匙)

胡椒粉 (少量), 油 (半茶匙), 生粉 (半茶匙)

調味料

紹興酒 (半茶匙), 蠔油 (約 2 湯匙), 鹽 (1/2 茶匙)

糖 (1 茶匙), 暖水 (1 1/2 碗)

做法

1) 豬排清洗乾淨, 抺乾水份, 用刀背剁鬆, 用醃料醃約30分鐘.

2) 薯仔去皮, 清洗乾淨, 切片, 備用.

3) 燒熱平底鑊落油, 下豬排煎至轉微黃, 盛起備用.

4) 原鑊落油, 下蒜頭爆香, 加入薯仔炒香, 贊酒, 下豬排拌勻, 加入蠔油及暖水, 加蓋炆約8-10分鐘, 期間要不時兜炒, 下鹽及糖調味, 煮至薯仔軟淋就可熄火盛起食用.



沙爹金菇牛肉

這幾天都好忙, 再加上病了, 所以今晚繼續無玩煮飯仔, 就請大家睇住我之前寫的 blog 文章, 今次介紹呢個餸好惹味又送飯一流小菜給大家.

好喇! 妳/你地慢慢睇, 我要去瞓啦!  ZzzzzZZZzzzzz
**************************************************************************

今晚終於成功煮到一個勁有沙爹味金菇牛肉喇! 因早前試過用另一牌子沙爹醬但煮出嚟完全唔係沙爹味, 後來同事介紹我用呢款 "利川花生沙爹醬" 果然超級有水準, 煮出嚟不單勁有沙爹味之外, 而且味道好香又惹味, 送飯一流呀!

材料
金菇菜 (2 包), 牛肉 (1 盒 - 約15 塊), 蒜頭 (5 粒 - 切碎)
乾蔥 (2 粒 - 切粒), 薑 (3 片)

醃料

生抽 (2 茶匙), 糖 (1 茶匙), 油 (半茶匙), 生粉 (半茶匙)

調味料

紹興酒 (半茶匙), 利川花生沙爹醬 (2 湯匙)

鹽 (少量), 糖 (1 茶匙)

做法

1) 牛肉清洗乾淨, 抺乾水份, 用醃料醃約15 分鐘. 金菇菜清洗乾淨,隔水備用.

2) 燒熱平底鑊落油, 下牛肉煎至微黃, 盛起備用.

3) 再燒熱平底鑊落油, 加入薑, 蒜頭及乾蔥爆香, 下利川花生沙爹醬一齊炒香, 加入金菇菜及贊酒, 下牛肉兜勻, 加蓋煮約 2 分鐘, 然後下鹽及糖調味拌勻, 熄火盛起食用.

 



哈蜜瓜炒雞脾肉

 

早前買了一個哈蜜瓜回家, 但一直都好忙 (其實係掛住去玩及慶祝自己生日) 所以沒有食到, 到今日諗煮咩餸時就諗起佢, 所以決定用佢嚟煮個清新小菜. 在這個炎炎夏日裏, 確實係一個令人好開胃又健康餸菜.

 

材料

哈蜜瓜 (1/4 個 - 切粒), 雞脾肉 (1 包- 切粒)

蒜頭 (6 粒 - 切粒), 暖水 (約2 湯匙)

 

醃料

生抽 (2 茶匙), 糖 (1 茶匙), 薑汁 (1 茶匙)

麻油 (少量), 生粉 (1 茶匙)

 

調味料

紹興酒 (半茶匙), 鹽 (半茶匙), 糖 (半茶匙)

 

做法:

1) 雞脾肉清洗乾淨,抺乾水份, 切粒, 用醃料醃約 20分鐘.

 

2) 燒熱平底鑊落油,加入雞脾肉煎到轉微黃色,下蒜頭炒勻,贊酒,加入調味料,注入暖水加蓋煮約2 -3分鐘. 然後開蓋, 見雞脾肉已熟透及汁料濃稠, 熄火, 加入哈蜜瓜兜勻, 盛起上碟慢慢享用.



感恩的生日

Happy Birthday to me!

哈哈..........好開心, 今年生日過得特別好開心, 因正正是我教會團契時間,可以同主內弟兄姐妹一齊渡過, 確實係好有意義又珍貴. 大家對我真誠祝福及禮物我全部都收到晒喇! 謝謝大家對我關愛 *3*

再加上收到 Honey 送嘅生日禮物, 今次生日就更加 So Sweet ^^

 

 



冬瓜瘦肉龍眼湯

 

今日係夏至, 而今日天氣確係好好好......熱呀! 真係需要飲番多d消暑湯水先得, 今次我加了龍眼肉一齊滾湯, 味到更加清新又香甜. 仲可以幫助瞓得好 ZzzzzZZZZ

 

材料

冬瓜 (1 斤 - 切件), 瘦肉 ($10), 龍眼肉 (20 粒), 薑 (3 片)

 

醃料

生抽 (1 茶匙), 糖 (1 茶匙), 紹興酒 (半茶匙)

 

做法:

1) 冬瓜切皮去籽, 清洗乾淨,切件, 備用.

 

2) 瘦肉清洗乾淨, 抺乾水份, 用醃料醃約20分鐘.

 

3) 燒滾一鍋水, 下薑片, 冬瓜及龍眼肉煲滾轉細火煲15分鐘.

 

4) 加入瘦肉煲煮約10分鐘, 下適量鹽調味拌勻就可食用.



可樂排骨

 

材料

腩排 ($40), 紅蘿白 (1 條 - 切小粒), 蒜頭 (5 粒 - 切粒)

蔥 (切段), 薑 (3 片), 可口可樂 (250 ml), 暖水 (150 ml)

 

調味料

生抽 (3 湯匙), 老抽 (1 湯匙), 紹興酒 (1 湯匙), 胡椒粉 (少量)

 

做法

1) 腩排清洗乾淨, 抺乾, 備用. 紅蘿白去皮, 用滾刀法切小粒.

 

2) 燒熱深鍋落油, 爆香薑片, 蒜頭及蔥, 加入腩排炒勻, 下調味料拌勻.

 

3) 加入可口可樂及暖水炆煮, 當水滾時轉細火炆 30分鐘, 加入紅蘿白炆15分鐘, 盛起食用.





京蔥爆羊肉

 

材料

羊肉 (2 包), 京蔥 (3 條 - 切片), 蒜頭 (4 粒 - 切粒)

 

醃料

生抽, 糖, 紹興酒, 生粉, 胡椒粉,麻油

 

調味料

豆瓣醬 (1 1/2 大茶匙)

 

做法

1) 羊肉解凍, 清洗乾淨, 抺乾水份, 用醃料醃約20-30分鐘.

 

2) 京蔥切片, 備用.

 

3) 燒熱平底鑊落油, 加入羊肉爆香, 煮到差不多熟透就可盛起備用.

 

4) 再燒熱平底鑊落油, 下蒜頭及京蔥爆香, 加入豆瓣醬拌勻, 再加入羊肉炒勻, 就可盛起慢慢食享用.

 



甜甜烏冬湯麵 (病人餐)

 

由於煮飯婆 (即係 "我") 病了, 需要食得清淡d, 但呢位煮飯婆唔係一個好鍾意食白粥嘅人, 所以佢自家整了一個 "清淡" 病人餐食, 用了好多紅蘿蔔煮了一個清湯, 味道 "清清甜甜" 非常開胃好味.

 

材料

甘筍 (2 條 - 切片), 水餃 (4 粒), 烏冬 (1 個)

 

做法

1) 甘筍去皮, 清洗乾淨, 切片, 備用.

 

2) 用一個小鍋注入清水, 水滾後加入甘筍煮約15分鐘, 下適量鹽調味, 加入水餃煮約5分鐘.

 

3) 最後加入烏冬煮約 2-3分鐘, 熄火盛起慢慢食用.



蠔汁墨魚滑釀節瓜

 

材料

節瓜 (2 條), 墨魚滑 ($30)

 

調味料

蠔油 (2 湯匙), 生粉 (1/2 茶匙), 水 (4 湯匙)

 

做法

1) 節瓜去皮, 清洗乾淨, 每條切開 4-5 件, 去除中間瓜瓤.

 

2) 在節瓜中間搽上少少生粉, 將墨魚滑釀入節瓜中間, 放在蒸碟上, 蒸約 15 分鐘. 熄火取出備用.

 

3) 燒熱另一隻鑊落油, 加入調味料煮熱, 然後淋在節瓜上, 就可食用喇!



白酒煮藍青口

這款藍青口是早前 "吉市" 做特價買, 只需解凍煮熟就食得, 不用清洗, 極之方便, 味道也不錯.

 

材料

藍青口 (1 包), 蒜頭 (4 粒 - 切碎), 蕃茄 (半個 - 切小粒)

紫洋蔥 (半個 - 切小粒), 白酒 (150 ml)

 

做法

1) 藍青口解凍後, 倒去多餘水份, 備用.

 

2) 燒熱鍋下牛油加入蒜頭爆香, 下蕃茄, 紫洋蔥及白酒炒香, 轉細火煮約8分鐘. 加入藍青口炒勻, 煮約 4 -5分鐘 (其間與汁料兜勻), 下適量鹽調味, 然後盛起食用.

 

 

香蒜豆豉炆豬手

今日好想煮豬手, 但每次炆煮都要1個鐘時間, 所以今次就用我新玩具 "氣壓煲" 嚟煮這惹味餸菜. WoW! 的確好好味, 我家奶奶勁鍾意食, 妳地有無興趣試吓呀?

 

材料

豬手 ($25), 蒜頭 (3 粒 - 切粒)

乾蔥 (1 粒 - 切粒), 薑片 (共 6 片 - 3片汆水用, 3片爆香用)

 

調味料

蒜蓉豆豉醬 (1 1/2 湯匙), 柱候醬 (2 茶匙)

蠔油 (3 茶匙), 冰糖 (2 -3 小粒 )

暖水 (剛浸過豬手就OK), 紹興酒 (1 湯匙)

 

做法

1) 豬手清洗乾淨, 凍水下薑片及豬手煲滾汆水, 盛起備用.

 

2) 燒熱氣壓煲落油, 下薑片,蒜頭及乾蔥爆香, 加入豬手爆炒, 贊酒, 加入調味料兜勻, 用氣壓煲蓋蓋住, 當開始加壓就轉細火炆20分鐘, 然後熄火待氣壓煲減壓後開蓋, 試味, 若夠入味及腍就可以盛起上碟, 或調較到自己喜愛濃度.

 

 

愛心小貼士

1) 如果用普通堡炆煮約1小時, 豬手入味及腍就OK.

 

2) 豬手用凍水加熱汆水係可以保證血水不會留在豬手內.

 

3) 若豬手炆煮期間不夠水份, 可以加適量暖水補充.



菠蘿生炒排骨

 

已有幾日無玩個煮飯仔喇! 今日正正放假有時間可以煮番幾味餸, 第一個想煮係 "菠蘿生炒排骨" 這個小菜對我嚟講係一項 "挑戰" 因為炸食物及蘸上蛋汁及生粉這步驟對我嚟講係好難, 之前曾經煮過一次結果失敗收場, 但我唔想就咁放棄, 今次仲算似d樣 (仍有改善進步空間) 好開心! 自己無放棄自己努力改善進步. 今次係參照美味娘娘新書食譜再加上少少改良煮出嚟, 大家都讚賞吓我喇!

 

材料

腩排 ($35), 紅椒 (切塊), 青椒 (切塊), 罐頭菠蘿 (3 片- 切塊)

 

醃料

鹽 (3/4 茶匙), 糖 (3/4 茶匙)

 

甜酸汁: 

(這份量係預多了, 我只用了 2/3 汁料, 因此大家可以刪減份量)

 

糖 (2 湯匙), 生抽 (2 茶匙), 生粉 (1 茶匙)

蕃茄醬 (3 湯匙), 罐頭菠蘿汁(細罐裝), 白醋 (2 湯匙), 水 (3 湯匙)

 

做法

1) 清洗乾淨腩排, 抺乾淨水份, 用醃料醃約1個鐘.

 

2) 腩排逐件蘸上蛋汁(3 隻)及生粉 (約6湯匙), 放入熱油中炸2分鐘, 盛起, 然後再次放入熱油中炸3分鐘, 盛起隔油備用.

 

3) 燒熱鑊落油, 加入紅椒及青椒爆炒, 下甜酸汁煮滾, 加入菠蘿及腩排快手炒勻, 熄火上碟食用.

 

 



芋絲炒翠肉瓜

 

材料

翠肉瓜 (1 條 - 切片), 芋絲 (5 件)

薑 (3 片), 蒜頭 (3 粒 - 切碎), 乾蔥 (1 粒 - 切碎)

 

調味料

紹興酒 (半茶匙 - 贊酒用), 鹽 (半茶匙)

糖 (1茶匙), 蠔油 (1 湯匙), 暖水 (約大半碗)

 

做法

1) 翠肉瓜清洗乾淨及切片, 備用.

 

2) 燒熱平底鑊落油, 下薑片,蒜頭及乾蔥爆香.

 

3) 加入翠肉瓜炒香, 贊酒, 下芋絲及調味料炒勻, 加入暖水加蓋煮約5-8分鐘, 熄火盛起食用.

 

 



老公下廚日記

呵呵.........今日係我放假日 (我指係不用做煮飯婆) 因為係由我至愛 Honey 親自下廚, 佢自己創作三款餸菜 (佢成日係我煮飯時會講埋一d 無厘頭餸菜, 我當然唔會理佢啦, 咁....今次輪到佢做煮飯公, 就等佢係廚房做 "實驗" 囉!) 哈哈......感恩, 無攪出人命, 味道也不錯. 就等我為大家介紹 Honey 餸菜大名.

 

上面圖片: 咖喱紅蘿白薯仔豆角雞肉

左面圖片: 蜜瓜冬瓜煮駝鳥肉

右面圖片: 蒜蓉炒烏冬

 

愛的感言

今天是我們結婚9週年紀念日，過去這年實在發生了好多事，健康上有你無微不至照顧，家庭方面有你同我分擔家務，情感上有你愛錫照顧，傷心時有你陪伴安慰，亦能與你一齊服侍主, 我真係好窩心又甜蜜. 謝謝天父對我們愛護,

亦謝謝愛我老公

“我們愛、因為神先愛我們”

 



粉葛牛蒡湯

 

自從買了氣壓煲返來煮飯煲湯後,真係方便好多, 煲出嚟湯水同平時煲成3小時明火湯水無咩分別, 而我今次用牛蒡嚟煲湯清甜又好味. So Good!

 

材料

粉葛 (1 個 - 切粒), 牛蒡 (4 條 - 切粒或切片), 紅蘿蔔 (1 條)

粟米 (1 條), 蜜棗 (3 粒), 南北杏 (少量), 西施骨 ($25)

 

做法

1) 清洗乾淨西施骨, 用滾水汆水, 盛起備用.

 

2) 用氣壓煲燒滾一鍋水後, 加入以上所有材料, 然後蓋上氣壓煲蓋, 當氣壓煲開始加壓, 就調較細火煲30分鐘, 然後熄火待減壓, 當減壓完後開氣壓煲蓋, 改用玻璃煲蓋再煲15分鐘加鹽調味就可飲用.



甜豆炒豬梅肉片

今日回娘家同爸媽及家人食飯, 未有時間玩煮飯仔寫blog. 但唔緊要, 為大家送上我之前寫過 blog 同大家分享一下

 

材料

甜豆 (1 包 - 撕去老筋), 豬梅肉片 (1 包)

蒜頭 (3 粒 - 切碎), 乾蔥 (1 粒 - 切碎)

醃料

油 (1 茶匙), 糖 (1 茶匙), 紹興酒 (半茶匙)

生粉 (半茶匙), 油 (半茶匙)

調味料

日式燒肉汁 (1 茶匙), 暖水 (半碗)

做法

1) 清洗乾淨豬梅肉片, 抺乾水份, 用醃料醃約20分鐘, 備用.

2) 甜豆清洗乾淨及撕去老筋, 備用.

3) 燒熱平底鑊落油, 加入豬梅肉片炒到軟淋轉色盛起備用.

4) 再燒熱平底鑊落油, 下蒜蓉, 乾蔥及甜豆炒香, 贊酒, 加入豬梅肉片炒勻, 下調味料加蓋轉細火煮約 3-5 分鐘, 其間加入適量糖調味, 煮熟後就盛起食用.

 



洋蔥炒西蘭花

 

材料

西蘭花 (2 個 - 切件), 洋蔥 (1 個 - 切條), 蒜頭 (4 粒- 切碎)

乾蔥 (2 個 - 切碎)

 

調味料

生抽 (1 茶匙), 鹽 (半茶匙), 糖 (半茶匙)

紹興酒 (半茶匙 - 贊酒用), 暖水 (半碗)

 

做法

1) 西蘭花清洗乾淨及切件, 用一鍋滾水加鹽, 下西蘭花汆水, 然後撈起用凍水沖水, 瀝乾待用.

 

2) 燒熱平底鑊落油, 下蒜頭及乾蔥爆香, 加入洋蔥炒到軟身, 加入西蘭花炒勻, 贊酒, 下其它調味料兜勻, 加蓋煮約 2 分鐘, 開蓋炒熟透盛起食用.