柱侯蘿蔔炆牛腩 (附食譜)

 

好耐無見！大家仲記唔記得我？👋 

呢幾年雖然少咗寫 Blog，但喺 Kitchen 嘅火從來無熄過。

​今日決定用呢道『柱侯蘿蔔炆牛腩』正式回歸！對我嚟講，燜牛腩就好似理財一樣，唔可以急，要用時間同耐心去換取最濃厚嘅成果。呢道菜我用咗『炆、焗、等』嘅循環邏輯，確保每一塊牛筋骨同牛孖筋都夠晒入味。加上就快過年, 這個餸絕對啱用來做賀年餸菜, 即刻睇食譜，同我一齊重新開火！

開火下油，爆香薑片及乾蔥，加入牛肋骨及牛孖筋炒香

贊酒

加入柱侯醬與食材兜勻

加入八角, 桂皮及香葉 (影相時忘記加入香葉一齊影😅)

加入冰糖

開始炆煮 (詳細煮法, 請睇以下內文)

第二天, 加入白蘿蔔一齊炆煮

暖笠笠 "柱侯蘿蔔炆牛腩 " 已煮好啦!  快埋位開飯啦! 😍

我怕了一條短睇片, 有興趣就去我 Facebook & Instagram 睇片 📹

材料:

Short Ribs 牛肋骨 (3 條 - 切件)

牛孖筋 (3 件 - 切件)

白蘿蔔 (1 條 - 滾刀法切件)

蔥 (1 扎 - 切段)

薑 (6 片汆水用, 6 片爆香用)

乾蔥 (2 粒 - 切開4份, 用刀背壓扁)

八角 (3 粒)

桂皮 (半枝)

香葉 (4 - 5 片)

調味料:

柱侯醬 (4 湯匙)

紹興酒 (3 湯匙 - 贊酒用)

冰糖 (1 粒)

暖水 (浸過所有材料就足夠)

蠔油 (約 1 湯匙)

做法:

1) 將牛肋骨解凍，再去骨，然後切開一半，再切件.

2) 牛孖筋解凍，然後切件.

3) 將已切件的牛肋骨及牛孖筋加入煲內，再加埋蔥段及薑片，注滿水後，然後汆水，當滾起後先取出牛肋骨，牛孖肋需單獨繼續煮 45 分鐘， 完成後盛起備用.

4) 開火下油，爆香薑片及乾蔥，加入牛肋骨及牛孖筋炒香，贊酒，然後加入柱侯醬與食材兜勻，下暖水蓋過食材，加入八角，桂皮及冰糖，然後加蓋，滾起後轉細火炆煮30分鐘，然後熄火焗30分鐘. 

5) 再開火，當水滾後轉細火煮炆煮30分鐘，再熄火焗30分鐘，最後再次開火，加入蠔油與食材兜勻，轉細火煮30分鐘，之後熄火待過夜.

6) 第二天，先將白蘿蔔去皮，洗乾淨及切件，然後加入煲內，加蓋小火炆煮 20 分鐘左右，然後熄火焗1 小時或半日，最後加熱就可盛起食用.

愛心提示:

1)  牛孖筋一定要先煲 30-45 分鐘左右，才能與牛肋骨一齊炆煮，這樣炆出來牛肋骨不會導致肉質過爛, 而牛孖筋有會炆出來軟淋淋，好入味.

2) 可以白蘿蔔同一日煮埋的. 只係我個人比較喜歡隔一晚炆定，因為隔了一晚牛肋骨及牛孖筋能讓纖維充分吸收醬汁精華.

按入這個 👉 My Facebook  👈就可以瀏覽我 Facebook