2013年7月24日 星期三

開心外食@Pizza Express

 
如果食西餐, 大家最鍾意食咩? 我就好鍾意食 Pizza & 麵包. 好鍾意那份口感, 近來我好心頭好係鍾意去 Pizza Express. 裡面有我好鍾意食好多芝士 Pizza & 又軟又熱麵包.

我地今晚係叫了一個 2人套餐, 有頭盤, 沙律, Pizza, 兩杯飲品及 Tiramisu. 合共$268 (另加一) 真係好抵又好飽肚. 值得大家去試吓.


 
 


頭盤
共有 3 款麵包選擇 - 我地揀 "布斯加逹麵包" 內有蕃茄,紅洋蔥,蒜蓉,香草汁. 麵包好軟熟又夠暖. 配埋醬料另人好開胃.


沙律
共有 3款選擇 - 今次我地試 "羊奶芝士蔬菜沙律"
講真沙律就一般, 但佢個配料 "麵包" 真係好好味 (我亦都係因為呢個包包所以再來食飯)

 

就係以下呢個 "麵包" 令到我好Like 呢間餐廳. (但我唔知個包叫咩名)
 

主菜
可以揀薄餅 or 意粉 - 我當然係揀薄餅, 我選了要附加$20 "帕爾馬薄餅" 內有帕爾瑪火腿, ricotta 芝士, 巴馬臣芝士, 迷迭香, 意式玉米粉.

哈哈................好多好多芝士, 又薄又好香脆, 味道配合得好好

 


我 Honey 食法

 
 
甜品
有 Tiramisu or 朱古力蛋糕選擇, 我揀我喜愛 "Tiramisu"
 

套餐價目表
 

* 呢個套餐只有星期一至四才有得供應, 大家要留意呀!




2013年7月22日 星期一

粟米雞粒

 
家裡有一盒 "地們 Sweet Corn Cream" 放在係雪櫃好耐一直未用過, 時時好想用咗佢, 今晚就有呢機會. 這款 Sweet Corn Cream 本身已好夠味, 唔需要再加入任何調味料, 只要與你想煮肉類配埋一齊已好好味 (當然肉類要先醃料先). 絕對係一款好好 "簡易家常餸"
 
材料
雞脾肉 (1 包 - 切粒), 地們 Sweet Corn Cream
 
醃料
生抽 (2 茶匙), 糖 (1 茶匙), 鹽 (1/2 茶匙)
麻油 (1/2 茶匙), 胡椒粉 (少量), 生粉 (1 茶匙)
 
做法
1) 雞脾肉清洗乾淨, 抺乾水份, 切粒, 用醃料醃約20 分鐘.
 
2) 燒熱平底鑊落油, 下雞脾肉煮熟, 盛起隔油備用.
 
3) 清洗乾淨平底鑊下牛油, 加入地們 Sweet Corn Cream 煮滾, 下雞脾肉拌勻, 就可盛起慢慢享用.
 下圖就係 "地們 Sweet Cron Cream"



2013年7月20日 星期六

信州小食

今次想同大家推介這款來自於日本信洲小食 "日式雜錦蛋卷" 有3 種口味 (共 20支), 好香脆又好味道, 仲係獨立包裝, 可以保存得更好. 佢係我在樓上店舖見到, 而且價錢好實惠 HK$29, 若妳係會員更只需HK$28. 大家不坊可以好似我咁買嚟放係公司肚餓時用嚟做小食.
 現在係樓上店舖買任何東西加 $19 就可換購 "美國有機果醬" 味道有: 西梅, 杏桃, 梨, 蘋果, 藍梅味道選擇.

 


2013年7月18日 星期四

蕃茄炆豬排

 
材料
蕃茄 (3 個 - 切 6 份), 梅頭豬排 (3 件 - 每件切 3 份)
洋蔥 (半個 - 切塊), 蒜頭 (3 粒 - 切粒)
 
醃料
生抽 (1 湯匙), 糖 (1 茶匙), 鹽 (少量)
紹興酒 (半茶匙), 生粉 (半茶匙)
 
調味料
茄汁 (3 湯匙), 糖 (2 茶匙), 鹽 (適量), 暖水 (1 1/2 碗)
 
做法
1) 豬排清洗乾淨抺乾水份, 用刀背剁鬆, 用醃料醃約20-30分鐘.
 
2) 燒熱平底鑊落油, 下豬排煎至兩面轉金黃色, 盛起備用.
 
3) 再燒熱平底鑊落油, 下蒜頭及洋蔥爆香, 加入蕃茄炒勻, 下茄汁及暖水加蓋轉細火煮約1-2鐘, 加入豬排及適量鹽或糖調味兜勻 (調較自己喜愛酸甜味道), 熄火盛起享用.
 

2013年7月17日 星期三

黑胡椒洋蔥辣肉腸炒蛋

 
一個好簡單又好味又健康小菜, 食時我仲覺得自己好似食緊 "早餐" ^^

材料
雞蛋 (6 隻), 辣肉腸 (1 條 - 切小粒), 洋蔥 (半個 - 切小粒)

調味料
鹽 (適量), 黑椒粉 (適量)

做法
1) 辣肉腸切小粒, 備用.

2) 雞蛋打勻, 下鹽調味, 加入辣肉腸拌勻.

3) 燒熱平底鑊落油, 下洋蔥炒香, 然後加入(第2項) 炒勻, 下少少鹽調味, 熄火下黑胡椒兜勻, 盛起慢慢享用.

 



 



2013年7月15日 星期一

味醬南瓜牛脷

 
日日都要諗要煮咩餸, 真係諗到頭到爆!!! 今日去吉市見到牛脷做緊特價, 非常新鮮, 就嗱嗱淋買嚟今晚煮餸用. 真的好有牛味又新鮮, 配埋南瓜及豆瓣醬好開胃又送餸一流.
 
材料
南瓜 (3/4 條 - 切粒), 牛脷 (2 包 - 已切片), 蒜頭 (4 粒 - 切碎)
 
調味料
豆瓣醬 (2 大茶匙), 鹽 (少量), 糖 (1/2 茶匙), 暖水 (半碗)
 
做法
1) 牛脷清洗乾淨, 抺乾水份, 備用.
 
2) 南瓜去籽及去皮, 清洗乾淨, 切粒, 備用.
 
3) 燒熱平底鑊落油, 下牛脷煮熟, 盛起隔油備用.
 
4) 用原鑊再落油, 下蒜頭爆香, 加入南瓜炒香, 贊酒, 下豆瓣醬兜勻, 加入暖水加蓋煮約2分鐘, 然後加入牛脷, 鹽及糖調味炒勻, 盛起慢慢享用.
 吉市買的牛舌脷非常新鮮, 勁有牛味!
 



2013年7月12日 星期五

青檸柚蜜雞拌金菇菜

 
大家望落呢個餸係咪覺得好平平無奇又好單調呢? 但我可以話妳知, 佢味道絕對一啲都唔單調, 反而帶有清新及酸尾尾味道. 最入味就係金菇菜. 妳都不坊都試吓!
 
材料
雞脾肉 (1 包 - 切粒), 金菇菜 (1 包), 蒜頭 (3 粒 - 切碎)
 
醃料
生抽 (2 茶匙), 糖 (1 茶匙), 玫瑰露酒 (半茶匙)
麻油 (少量), 生粉 (半茶匙)
 
調味料
柚子蜜 (2 湯匙), 青檸 (2 個 - 榨汁), 鹽 (適量), 暖水 (2 湯匙)
 
做法
1) 雞脾肉清洗乾淨, 抺乾水份, 用醃料醃約20分鐘, 備用.
 
2) 金菇菜清洗乾淨後, 用一小鍋煲滾水, 下日式味噌(1大茶匙)及鹽撈勻調味, 加入金菇菜煮熟, 取出隔水, 放在碟上備用.
 
3) 燒熱平底鑊落油, 加入雞脾肉煎至金黃色, 將雞脾肉放埋鑊邊, 加入蒜頭爆香, 下柚子蜜及鹽拌勻後加入暖水加蓋煮約1-2分鐘, 熄火後加入青檸汁拌勻, 盛起放在金菇菜上就可慢慢享用.

 
 
 
 
 




2013年7月11日 星期四

龍眼木瓜雪耳糖水

 
 
今日好想好想好想整甜品, 好想食龍眼, 好想食木瓜, 咁就整 "龍眼木瓜雪耳糖水" 夠滋潤, 又美顏, 又潤喉, 又安神. So Good  & So Sweet!

材料
木瓜 (3 個 - 切粒), 雪耳 (2 個 - 撕成小塊)
乾龍眼肉 (約 15 - 20 粒)

調味料
冰糖 (2 大粒 - 或隨個人喜愛甜度)

做法
1) 木瓜去皮及去核, 切粒, 備用. 龍眼肉用水清洗, 備用.

2) 將雪耳浸水, 至發大後剪去硬身, 撕成小塊.

3) 燒熱一鍋滾水, 下木瓜及雪耳, 當水再滾起時轉細火煲半小時, 加入冰糖調味, 下龍眼肉煲15分鐘, 熄火就可食慢慢享用.
 

 
 







2013年7月10日 星期三

惹味醬爆牛仔骨

 
近排工作好忙, 加上又病了, 但仍要回家煮飯, 但都係比較簡單, 所以連 post blog 都只係出食譜, 多隻字都唔想寫, 請大家多多包涵.

材料
牛仔骨 (4 件 - 每件分3件), 蒜頭 (5 粒 - 切碎)
乾蔥 (2 粒 - 切粒)

調味料
鹽 (少量), 李錦記醬爆牛仔骨醬 (1 包), 暖水 (3 - 4 湯匙)

做法
1) 牛仔骨解凍, 清洗乾淨, 切件, 備用.

2) 燒熱平底鑊落牛油, 將牛仔骨每邊平均煎1分30鈔 (其間下少少鹽調味), 取出及隔油備用.

3) 用原鑊下蒜頭及乾蔥爆香, 加入醬爆牛仔骨醬及牛仔骨拌勻.下少少暖水加蓋煮2鐘, 熄火盛起食用.
 
 
 

 
 

2013年7月8日 星期一

日版油麥菜


這幾天都完全無玩過煮飯仔, 原因就係 "我被病魔打敗了" 今次感冒對我嚟講太辛苦. 因為我已經好耐未試過感冒會 "發燒" 攪到我周身骨痛, 頭又赤痛, 仲要胃痛. 真係咩都唔想做. 所以今日大家都繼續睇住舊文章先喇!

哈哈.......點解我揀呢個餸post出嚟, 因為我發覺好多時食葯期間都比較熱氣. 便便都無咁輰通, 食番多d蔬菜對腸道健康會好好多架!
****************************************************************
材料
油麥菜 (半斤 - 切段), 蒜頭 (4 粒 - 切粒)

調味料
味噌 (2 大茶匙 - 用少少暖水開稀)
醬油 (2 茶匙), 料理酒 (2 茶匙)

做法
1) 油麥菜切段, 清洗乾淨, 備用.

2) 燒熱鑊落油, 下蒜頭爆香, 下味噌同炒香, 加入油麥菜炒勻, 然後下料理酒炒一陣就加埋醬油調味, 煮至熟透就可熄火盛起食用.
 
 
 

2013年7月3日 星期三

自家BBQ雞翼

較早之前買了一支原味燒烤汁焗豬肋骨, 我想今次嘗試用佢嚟整BBQ雞翼, 醃了一整晚, 味道不錯, 但下次焗之前我會再落多 1-2湯匙原味燒烤汁拌勻去焗, 應該會更加好好味 ^^

材料
雞翼 (12 隻)

醃料
蒜頭 (6 粒 - 切碎), 乾蔥 (2 粒 - 切碎)
海鹽 (1 茶匙)黑胡椒 (1 茶匙), 原味燒烤汁 (3 湯匙)

調味料
麥芽糖 (1 湯匙)

做法
1) 雞翼清洗乾淨, 用醃料醃整 1 晚. 用熱水坐麥芽糖, 備用.

2) 焗爐預熱 200 度, 將雞翼並排在鋪了鍚紙焗盤上. 用 180度每邊焗10分鐘.

3) 然後每邊掃上麥芽糖用220 焗 8 -10分鐘, 取出放碟上食用.

 

2013年7月1日 星期一

日式金菇菜炒節瓜

 
材料
金菇菜 (1 包), 節瓜 (1 個 - 切條)
蒜頭 (4 粒 - 切碎), 乾蔥 (1 粒- 切粒)
 
調味料
日式醬油 (2 茶匙), 味醂 (1 茶匙), 料理酒 (1 茶匙)
鹽 (半茶匙), 暖水 (半碗)
 
做法
1) 金菇菜浸水, 清洗乾淨, 隔水, 備用.
 
2) 節瓜去皮, 清洗乾淨, 切條, 備用.
 
3) 燒熱平底鑊落油, 爆香蒜頭及乾蔥, 加入節瓜炒勻, 下料理酒兜勻, 加入金菇菜, 注入日式醬油, 味醂及暖水拌勻, 加蓋煮約3-5分鐘, 然後下鹽調味, 盛起食用.
 
 
 
Related Posts Plugin for WordPress, Blogger...