一品鍋 (蕃茄薯仔湯底) (附食譜)

凍冰冰日子都係食 d 熱辣辣食物最好 (嘻嘻.......有可以唔駛煮得咁辛苦) 不過, 分享埋今日這個食譜, 暫時會有十日時間都應該唔會有煮飯仔分享了. 

因為我要照顧我妹妹. 妹妹早前確診有腎癌, 感恩是屬早期, 所以只需切除癌細胞組織就得, 化療及電療都不需要做. 下星期就要做手術, 到時除了返工, 我大部份時間都會幫手照顧她. 所以稍後再同大家 blog見面喇! 但大家都可要入嚟我 blod 睇吓其它食譜, 或來我 Facebook 看看我的近況. 嗱!.....大家要繼續支持我呀!

 
材料

肥牛 (半磅), 金菇菜 (1 包), 娃娃菜 (2 件  - 切塊), 南瓜 (半個 - 切粒), 小帶子 (1 包), 蝦滑 ($20), 粟米 (1 條 - 切件), 豬紅 ($5)

湯底做法

 蕃茄 (7 個 - 切小粒), 薯仔 (2 個 - 切小粒), 鹽 (少量)

做法

1) 蕃茄清洗乾淨及切小粒. 薯仔去皮, 清洗乾淨及切小粒. 煲滾一鍋水, 下蕃茄粒及薯仔粒煮約 30 分鐘, 下鹽調味, 蕃茄薯仔湯底就成了.

2) 金菇菜, 娃娃菜, 豬紅及小帶子清洗乾淨. 南瓜去皮, 清洗乾淨及切粒. 粟米清洗乾淨及切件.

3) 將所有食材加入蕃茄薯仔湯底煮熟就可慢慢享受暖入心美食.


請來我 Facebook 專頁按 "讚好" 給我支持啦!