羊腩煲

天寒地凍! 攪到個人手又凍腳又凍, 一定一定要煮 d 暖笠笠食物保暖先得!

 

食 "羊腩煲" 絕對是一個至佳好選擇. 嘻嘻........今次呢個 "羊腩煲" 係在昨天 "一生一世 (2013年1月4日)" 晚上炆定架, 所以留待今晚食時更加軟稔入味.

 

材料

羊腩 (約 2 磅), 冬菇 (8 隻), 枝竹 (1 包), 馬蹄 (半磅)

薑 (6 - 7 片), 蒜頭 (6 - 7 粒 - 切片), 乾蔥頭 (3 粒 - 切片)

陳皮 ( 1 片), 香葉 (4 - 5 片), 南乳 (1 大磚)

柱侯醬 (約 2.5 湯匙), 花生醬 (約 2.5 湯匙), 冰糖 (2 小粒)

 

做法

1) 羊腩先用清水洗乾淨, 汆水備用. 冬菇浸軟, 去蒂, 浸冬菇水留待備用.

 

2) 燒熱鑊落油, 爆香薑, 蒜頭及乾蔥頭, 跟住加入羊腩兜炒片刻. 用紹酒爆香. 再下馬蹄炒勻.

 

3) 加入南乳, 柱侯醬, 花生醬爆香羊腩, 注入暖水浸過羊腩. 放入陳皮, 香葉及冰糖.

 

4) 蓋上鑊蓋炆煮約10 分鐘後, 將所有材料倒進砂煲內繼續炆煮, 當水滾起時轉細火炆煮 30分鐘, 跟住熄火焗 15分鐘, 再開火加入冬菇及冬菇水, 當水滾轉小火炆煮 20分鐘, 再熄火焗15分鐘, 再次開火, 當水滾時轉小火炆煮 20分鐘熄火, 留待隔天備用.

 

5) 第二日再大火煲滾後加入枝竹, 轉小火炆煮約10 - 15 分鐘, 然後一大鍋上飯枱, 開著 Gas爐加入唐生菜慢慢享受食用暖笠笠晚餐.