日版油麥菜

這幾天都完全無玩過煮飯仔, 原因就係 "我被病魔打敗了" 今次感冒對我嚟講太辛苦. 因為我已經好耐未試過感冒會 "發燒" 攪到我周身骨痛, 頭又赤痛, 仲要胃痛. 真係咩都唔想做. 所以今日大家都繼續睇住舊文章先喇!

哈哈.......點解我揀呢個餸post出嚟, 因為我發覺好多時食葯期間都比較熱氣. 便便都無咁輰通, 食番多d蔬菜對腸道健康會好好多架!
****************************************************************

材料
油麥菜 (半斤 - 切段), 蒜頭 (4 粒 - 切粒)

調味料
味噌 (2 大茶匙 - 用少少暖水開稀)
醬油 (2 茶匙), 料理酒 (2 茶匙)

做法
1) 油麥菜切段, 清洗乾淨, 備用.

2) 燒熱鑊落油, 下蒜頭爆香, 下味噌同炒香, 加入油麥菜炒勻, 然後下料理酒炒一陣就加埋醬油調味, 煮至熟透就可熄火盛起食用.