枝竹羊腩煲 (附食譜)

 

我第一次煮的冬至晚餐特別為家人預備了一鍋暖笠笠羊腩煲, 盼望為大家送上 "家" 的温暖.  而且這亦是我家 Honey 至愛餸菜 (其實我發現好多男人都好鐘意食羊腩煲) 為了要讓羊腩煲更加入味, 我預早一晚就炆定佢, 留待第二晚食時就會好淋又入味. 親戚朋友們及Honey 好快就同我食晒啦.

材料
羊腩 (3 磅), 冬菇 (約 15 粒), 枝竹 (5 條 - 切段)
馬蹄 (半磅 - 去皮), 薑 (6 片), 蒜頭 (6 粒 - 切片)
乾蔥頭 (4 粒 - 切片), 陳皮 ( 1 片), 香葉 (4 - 5 片)

調味料
南乳 (2 大磚), 柱侯醬 (約 3 湯匙), 花生醬 (約 3 湯匙)
紹興酒 (1 大茶匙 - 贊酒用), 冰糖 (2 小粒)
暖水 (水份夠蓋過羊腩就得)

做法
1) 羊腩先用清水洗乾淨, 下蔥汆水, 備用.

2) 冬菇浸軟, 去蒂, 浸冬菇水留待備用.

3) 燒熱鑊落油, 爆香薑片, 蒜頭及乾蔥頭, 跟住加入羊腩兜炒片刻, 贊酒.

 4) 加入南乳, 柱侯醬及花生醬爆香羊腩, 下馬蹄及冬菇水. 當水開始微滾時就將所有材料注入真空煲內煲中, 再加入陳皮, 香葉及冰糖. 及能剛浸過羊腩的暖水, 炆煮約 30分鐘, 熄火後整煲放入真空煲內, 留待明日使用.

 5) 第二日從真空煲內取出, 用大火煲滾後加入枝竹, 轉小火炆煮約10 分鐘, 然後放回真空煲內煲中, 靜待半日, 在食用前番熱就可享用暖笠笠羊腩煲喇! 

未煮之前羊腩

 已經浸淋冬菇

 用羊腩汁來灼菜, 絕對是一流!