食得清d

這幾天都無 post 過任何 blog, 因為後日我要做一個檢查, 所以這幾天都開始食得清淡d (順便 Keep 下 fit). 宜今晚原本要去醫院探一位教友, 但臨時取消了, 又趕唔切回家玩煮飯仔. 就去咗和民食嘢. 你地估我食咗咩????

就係 "明太子石鍋茶漬飯"

 

 

呢位太子爺我都係最近去和民才識得佢, 原來 "明太子" 係好好食架, 配合埋茶漬飯食好入味. 當我一諗到要食得清d就想起佢. 或許, 大家會諗食得清d唔係食白粥嗎? 正確嚟講是的, 但對於我本人除咗病到死死吓, 我都唔會食粥架!!!  

電腦化世代

今日中午去咗板前食 Lunch, 剛坐下不久, 侍應就給我一塊平版電腦, 原來是用來落 order 用. 嘩!.....宜家連食嘢都變得咁高科技化.

或許, 可能只係我比較大鄉里啦! 但再想一想, 宜家好多食肆都轉用電腦取票等位. 在繼續落去會否用晒電腦科技, 而縮減更多酒樓員工????

算啦! 唔好再講, 可能係我諗多咗. 講番用電腦落 Order 有確係好方便, 圖像清晰, 落單手續有唔複雜, 有可以慢慢揀, 確係一個好幫手.
 



蟹籽蒸蛋

今晚繼續煮一些簡單小菜, 容易入口小菜,  方便奶奶進食.

所以我煮了 "蒸水蛋" 但我加了少少東西作點綴.

嘻嘻............加了什麼???

就是  "日式蟹籽"  喇!!!
另到平平無其蒸水蛋, 變得美麗起嚟.

材料

雞蛋 (4 隻), 清水 (約大半碗), 蟹籽 (半茶匙)

做法
1) 將雞蛋拂勻, 加入清水及鹽拌勻. 注入蒸碟中.

2) 於蒸碟鋪上保鮮紙, 放入蒸鑊中, 大火蒸 8 分鐘, 盛起.

3) 然後在蒸蛋表面洒上蟹籽, 就可食用啦!
 

愛心提示
其實大家可以選擇用清雞湯或鮮奶代替清水煮蒸蛋, 我選用清水是因為我自小媽媽都是用清水煮蒸蛋, 所以每次用清水煮就會令我有一種好親切感覺.



愛心 - 咸魚蒸肉餅

奶奶自從脫了爛牙後, 由於傷口好大, 令她好多食物都食唔到. 所以再整了咸魚蒸肉餅給她食, 希望剁碎了豬肉她能食到, 結果她食完一碗飯, 仲再嚟多一碗, 見她有胃口食嘢, 我都好開心, 感謝主! 求主醫治奶奶傷口早日康復, 阿門!

材料

咸魚肉餅 (1 盒)

調味料

生抽 (2 茶匙), 糖 (1 茶匙), 油 (半匙)
麻油 (少量), 生粉 (半茶匙)

做法
1) 肉餅用手撻鬆, 約 20 下, 加入調味料醃約 30 分鐘.

2) 放入蒸鑊中蒸 15 分鐘, 就可熄火盛起食用.

 

熱騰騰的日式湯麵

 

好喜歡今晚晚餐, 雖然係好簡單, 買相亦好普通, 但食緊時真的會有一種感覺好像身在日本家庭或日式餐廳中, 有好濃濃日本 feel 味, 超 Like!!! 

 

材料

簥麥麵 (3 扎), 日式魚蛋 (10 塊) , 日式蟹柳 (6 條)

調味料
日式濃縮昆布麵汁 (100 ml), 暖水 (600 - 800 ml)

做法
1) 煲一鍋滾水, 下蕎麥麵煮 4 分鐘, 然後撈起, 用凍水過冷河,隔水備用.

2) 另預備一小鍋滾水, 將日式魚蛋及蟹柳煮熟, 盛起備用.

3) 用一個小煲下濃縮昆布麵汁煮熱, 然後將麵汁倒在湯碗內, 加入己煮熟蕎麥麵及日式魚蛋及蟹柳就可享用一碗熱騰騰湯麵.

 

 

鱷魚肉海底椰川貝西施骨湯

 

天氣開始轉涼了, 若氣管比較敏感的人, 會好容易呼吸道不適. 鱷魚肉具有益肺作用，對於呼吸系統是好有幫助的，以鱷魚肉作湯品尤其適合在忽冷忽熱的天氣食用，有助於止咳潤肺，補健強身.

 

材料

急凍鱷魚肉 (1 包), 海底椰 (約8 - 10 個), 川貝 (半襾)

蜜棗 (2- 3 粒), 淮山 (2 -3 片), 無花果 (6- 7 粒)

果皮 (2 片), 西施骨 (約 $30)

 

做法

1) 西施骨及鱷魚肉先汆水備用.

 

2) 用一個深鍋煲滾一鍋水, 將西施骨, 鱷魚肉及所有材料倒進深鍋內, 待水再煲滾, 轉細火煲約 2-3小時加適量鹽調味即成.

 



夠(薑)芝麻湯圓蕃薯糖水

今晚放工在路上, 一直諗煮糖水食好不好? 煮咩糖水食好呢?
 

最後我決定煮夠 "薑" 蕃薯糖水. 因為我鍾意食蕃薯, 加上天氣開始轉涼, 食番個夠晒 "薑味" 糖水來暖一暖都好架.

奶奶好喜歡個糖水夠晒 "薑味", 而老公就無食蕃薯, 反而用糖水煮了芝麻湯圓食, 嘻嘻.......我同奶奶都跟老公每人要了兩粒湯圓, 結果就變成了  "夠(薑)芝麻湯圓蕃薯糖水"

材料
芝麻湯圓 (7 粒), 蕃薯 (2 個 - 切粒)
薑 (15-20片), 片糖 (2 1/2 條)

做法

1) 燒滾一鍋水, 加入片糖煮溶, 試味 (調較自已喜歡甜度).

2) 下薑片煮約10 分鐘, 加入蕃薯煮約 20-25分鐘.

3) 加入芝麻湯圓, 待湯圓浮上面, 就熄火慢慢盛起享用.

 

 



 

甘筍金菇菜炒帶子

 

奶奶最緊脫了爛牙, 所以食嘢能力唔係太好, 所以煮了一些簡單小菜, 讓她容易咀嚼. 雖然係好簡單, 但味道絕對係有水準. 盼望奶奶牙患早日康復.

 

材料

新鮮帶子 (1 包 - 約 20 粒), 甘筍 (1 條 - 切絲)
金菇菜 (1 包), 蒜頭 (4 粒 - 切粒)

醃料
生抽 (1 茶匙), 胡椒粉 (少量), 麻油 (少量)

調味料
清雞湯 (約 6 湯匙), 蠔油 (1 湯匙), 鹽 (少量)
糖 (半茶匙), 暖水 (約1碗), 紹興酒 (半茶匙 - 贊酒用)

做法
1) 清洗乾淨帶子, 汆水, 盛起隔水, 用醃料醃約 20 -30分鐘.

2) 甘筍去皮, 清洗乾淨, 切絲. 金菇菜用水浸一會, 清洗乾淨, 備用.

3) 燒熱平底鑊落油, 下蒜頭爆香, 加入甘筍炒香, 下半碗暖水加蓋煮約 2分鐘.

4) 加入金菇菜炒勻, 贊酒, 下清雞湯及蠔油拌勻, 下鹽及糖調味, 加入少量暖水加蓋煮 2 - 3 分鐘, 下帶子炒熟, 盛起享用.



愛筵

今晚真係好開心, 因為又再可以同團契弟兄姊妹愛筵, 今次係打邊爐 + 自家叉燒, 仲試咗我新整 "柚子蜜蒟蒻啫喱"  我真係好感謝主! 賜下有"興趣"煮飯這個恩賜給我. 讓我有興趣不繼學習煮不同食物, 亦藉著喜歡煮飯可以同主內肢體建立更心友誼, 增進彼此間認識. 所以話呢.......信主兒女真係好幸福架!



我至愛 "叉燒" 哥

柚子蜜蒟蒻啫喱

 

 

糖醋排骨

糖醋排骨係我好喜歡餸菜之一, 但對我嚟講要整一件靚糖醋排骨絕對不容易, 今次呢個煮法係我首次嘗試, 效果都不錯, 但仍有d嚡, 究竟要點樣煮先至唔會嚡呢! 有無人可以話我知呀!?

材料

一字排骨 (6 條), 乾蔥 (1 粒 - 切粒), 蒜頭 (5 粒 - 切粒)

調味料
紹興酒 (1 茶匙), 生抽 (1 1/2 湯匙), 鎮江醋 (100 ml)
暖水 (200 ml), 片糖 (大半條)

做法

1) 清洗乾淨, 抺乾水份, 備用.

2) 燒熱鍋落油, 加入一字排骨煎至微黃色, 撥開一字排骨在邊位, 下乾蔥及蒜頭爆香.

3) 贊酒, 下生抽, 鎮江醋, 暖水及片糖兜勻一字排骨, 細火炆煮約 30分鐘 (其間要留意是否要加暖水及試味), 最後開蓋煮至收汁, 盛起享用.

 

日式毛茄炒牛柳絲

每日煮飯都要諗煮咩餸菜, 確實係唔容易, 今日呢個餸都係去到超市見到有咩就將佢地 mix 埋一齊, 再配合用日式醬料來煮, 效果有好好喎, Yeah!

材料

牛柳絲 (1 盒 - 已切絲), 毛茄 (1 盒 - 切粒), 蒜頭 (4 粒 - 切粒)

醃料

黑胡椒 (適量), 麻油 (少量)

調味料

料理酒 (1 茶匙), 醬油 (2 茶匙), 味醂 (1 茶匙)

做法

1) 清洗乾淨牛柳絲, 抺乾水份, 待煮之前10分鐘用醃料醃住.

2) 燒熱平底鑊落油, 爆香蒜頭, 下牛柳絲兜炒, 加入毛茄一齊同炒, 下調味料炒勻, 熄火, 用餘温炒至自己理想熟度, 就可盛起享用.

 



韓 Bear

又有手信收啦! 同事剛剛從韓國濟洲回來, 送了一個超級可愛穿著韓服 Bear Bear 熊公仔給我.

好喜歡這個公仔擺設, 做型亦好精緻美麗.

謝謝 Hello Cat 同事



上面紅色公仔係我, 另下圖有藍色公司是我一位公司的.

還有, 濟洲名產小食 "雞泡魚乾-辣味"

 

Happy hr

昨晚與主內肢體一齊食飯又一齊飲嘢。分享了大家近況及彼此需要，實在好喜歡這種聯誼，可以好坦誠分享，無須掩飾，願主保守祝福我們這份友誼.

中西合璧 - 沙薑粉迷迭香焗燒雞

Hello! 各位, 我靚唔靚啫? 又無流晒口水? 嘻嘻........我叫沙薑粉迷迭香燒雞, 個名係咪好長呢? 因為我係中西合璧混合產品. 等我詳細自我介紹吓.

材料
冰鮮雞 (1 隻)

醃料
沙薑粉 (1 包), 海鹽 (約 1 湯匙), 迷迭香 (2 扎)
老抽 (約 1 湯匙), 黑胡椒 (約 1 茶匙), 牛油 (適量), 蜜糖 (適量)

做法
1) 清洗乾淨冰鮮雞, 抺乾淨水份, 在雞表面及內腔都均勻搽上海鹽及沙薑粉, 現後放入雪櫃雪過夜.

2) 第二日從雪櫃取出醃過雞, 放在室溫放暖, 預熱焗爐160度, 然後在雞身均勻曬上黑胡椒及搽上老抽. 然後將迷迭香放入雞腔內跟住用針封住, 最後在雞身上均勻搽上牛油, 放入焗爐用180度旋轉焗雞, 約 35-40分鐘後用針插入雞腿厚肉處, 只見透明水流出即是熟透. 然後在雞身上搽上蜜糖用220度旋轉焗約 5分鐘, 再搽多一次蜜糖旋轉焗約 5分鐘, 然後取出雞放涼約10分鐘切件上枱即可享用.

  

菜脯炒蛋

又係一個開胃簡易食譜

材料
雞蛋 (4 隻), 即食菜脯 (1 包), 蔥段 (少量)

做法
1) 菜脯用熟水及少量鹽浸10分鐘.

2) 雞蛋打勻, 下蔥段拌勻.

3) 燒熱平底鑊落油, 下菜脯炒香, 加入雞蛋兜勻煮至半熟透, 熄火用餘温煮至自己理想熟透程度.