蠔汁冬菇馬蹄炆羊腩 (附食譜)

 

 

好凍呀! 凍死我! 我真係好唔鐘意冬天. 我要食d 暖笠笠食物. 暖住自己, Honey及家人. 今晚就食羊腩啦! 用氣壓煲炆煮,好快就有得食. 起筷喇!



 

材料

急凍紐西蘭羊腩 (1 包 - 約15 件), 冬菇 (12 隻 - 切半)
馬蹄 (15 粒), 蔥 (1 扎), 薑 (8 片)
蒜頭 (6 粒 - 拍扁), 乾蔥 (1 粒 - 切粒)

調味料

蠔油 (4 湯匙), 柱候醬 (1 湯匙), 冰糖 (適量)
冬菇水 (約 3 1/2 碗)

做法

1) 羊腩解凍, 清洗乾淨, 用蔥及薑汆水, 盛起備用.

2) 冬菇用水浸軟及剪去菇蒂, 清洗乾淨及切半, 再用水浸冬菇, 留冬菇水備用.

3) 燒熱氣壓煲落油, 下薑片, 蒜頭及乾蔥爆香, 加入羊腩爆炒, 贊酒, 下馬蹄及冬菇炒勻, 加入調味料及冬菇水, 用氣壓煲蓋蓋住, 當開始加壓就轉細火炆 16 分鐘, 然後熄火待氣壓煲減壓後開蓋, 試味, 若夠入味及腍就可以盛起上碟食用.

愛心小貼士
1) 今次我用羊腩比較細件,所以只需炆16 分鐘就足夠, 一般用氣壓煲炆羊腩時間是 15 - 20 分鐘.

2) 假若在妳/你指定時間內炆完仍覺未夠腍, 可以用明火炆多約15 分鐘應該就會好腍了. 記住要留意水份是否足夠呀!