紅白蘿蔔炆豬軟骨(中式煮法) (附食譜)

一直都好想煮豬軟骨, 見週未有時間, 立刻去咗超市買包豬軟骨回家玩煮飯仔 (我住那邊街市或許太細, 揾唔到有豬軟骨買, 所以跟 blog 友教路去 Citysuper 買). 至於用中式煮法是 Honey 意思 (其實我係好想用日式煮法).

今次我專誠用明火炆煮, 因為我好想觀察用明火炆煮整個過程效果. 利用 "炆及焗" 方法, 炆到所有軟骨都好淋又入味, 連我奶奶牙力比較差 d 都食得好滋味,  Honey 亦好喜愛, 他仲講是他提議用中式煮法所以才咁好味. (啍!......下次我一定會嘗試用日式及韓式煮法, 睇下到時你有點講!!!)

 

材料

豬軟骨 (1 包 - 550 g), 紅蘿蔔 (1 條 - 切件)

白蘿蔔 (1 條 - 切件), 香葉 (4 片- 撕開一半)

薑片 (3 塊 - 汆水用, 3 塊 - 爆香用)
蔥 (1 扎 - 切段, 用作汆水及爆香)
乾蔥 (2 粒 - 切粒), 蒜頭 (7 粒 - 拍扁)

調味料

柱候醬 (約 3 - 4 湯匙), 生抽 (1 1/2 茶匙), 紹興酒 (1 湯匙 - 贊酒用)

冰糖 (約 1 茶匙), 暖水 ( 約 700 ml), 鹽 (少量)

做法

1) 豬軟骨清洗乾淨, 用薑片及蔥汆水 10 分鐘, 盛起備用.

2) 紅蘿蔔及白蘿蔔去皮及切件. (白蘿蔔未用時候用水浸住, 可免變色)

3) 開火下油, 爆香薑片, 乾蔥, 蒜頭及蔥段, 加入豬軟骨炒, 贊酒, 下紅蘿蔔拌勻. 加入柱候醬, 生抽及香葉兜勻, 下暖水及冰糖, 當水滾起時轉細火炆 30 分鐘, 熄火焗 30 分鐘. 再開火用細火炆 20 分鐘, 熄火焗 20 分鐘.

4) 最後開火加入白蘿蔔用細火炆 25分鐘, 下鹽調味拌勻, 熄火焗一陣就可享用美食.

愛心小貼士
炆煮期間大家要留意水份是否足夠.



請來我 Facebook 專頁按 "讚好" 給我支持啦!