韓汁蘆筍肥牛卷 (附食譜)

 

個人 FB 有好多朋友都好 Like 這個小菜, 既然大家都咁喜歡它, 就等我先介紹它出場. 煮這個小菜唔難, 但就要有耐性慢慢將蘆筍捲入肥牛肉內, 否則好難捲得靚. 其實都是工多藝術, 捲得多自然就會好靚靚 (其實我都未算係捲得最好, 仍然學習中!) 煎煮牛肉亦不需要煎得太熟, 否則會好硬及好嚡!

我就係用以下韓式牛內汁來醃牛肉及做醬汁料.

材料

肥牛肉 (1 盒), 蘆筍 (16 條 - 切半)

醃料

韓式牛肉汁 (1 茶匙), 生抽 (1 茶匙), 黃糖 (1/2 茶匙)

胡椒粉 (少量)

醬汁料

韓式牛肉汁 (5 茶匙)

做法

1) 肥牛肉清洗乾淨, 抺乾水份, 用醃料醃約 15 分鐘, 備用.

2) 蘆荀清洗乾淨, 在一鍋熱水中加入鹽, 下蘆筍灼煮約 2 分鐘, 撈起放入冰水中過冷河, 然後抺乾水份, 跟住每條切半, 備用.

3) 將肥牛肉攤平, 放上蘆筍慢慢捲起, 於尾部用生粉埋口.

4) 開火下油, 用細火將蘆筍肥牛卷煎熟 (約煎 3 1/2 分鐘), 然後盛起隔油, 之後平放於碟上, 備用.

5) 倒去多餘油份, 抺乾平底鑊, 下韓式牛肉汁煮滾, 就可淋在蘆筍肥牛卷上.




請來我 Facebook 專頁按 "讚好" 給我支持啦!