都話我好鍾意用生果做煮飯仔食材, 健康之餘又能令整碟餸變得清爽可口, 減輕了午餐肉的油膩感 (就快到限期午餐肉因此必需要煮了). 今次我仲用埋灼芥蘭苗的菜頭加入一齊煮, 既健康清爽又不會浪費食材, 嘻嘻!.........連我家奶奶都讚我識慳家有諗頭.
材料
茄子 (1 條 - 切小粒), 芥蘭苗菜頭 (1/3 飯碗份量 - 切小粒)
午餐肉 (1 罐 - 切粒), 蘋果 (2 個 - 切小粒)
蒜頭 (4 粒 - 切粒), 乾蔥 (1 粒 - 切粒)
調味料
清雞湯 (2 湯匙), 生抽 (2 茶匙), 黃糖 (1/2 茶匙)
紹興酒 (2 茶匙 - 贊酒用)
做法
1) 茄子及芥蘭苗菜頭清洗乾淨, 切小粒, 茄子要用鹽水浸住, 備用.
午餐肉切小粒, 備用.
蘋果去皮, 切粒, 用鹽水浸住, 備用.
2) 開火下油, 加入芥蘭苗菜頭炒香, 再加入茄子同炒, 贊酒, 下清雞湯加蓋細火焗煮約 1 1/2 分鐘, 盛起備用.
3) 再開火下油, 爆香蒜粒及乾蔥粒, 加入午餐肉煎煮 8 成熟, 加入茄子及芥蘭苗同炒勻, 加入生抽及黃糖調味, 熄火加入蘋果拌勻就可盛起食用.
沒有留言:
張貼留言