毛茄炒蒜蓉豆豉排骨 (附食譜)

唉!.........這個寒流真係好勁, 而且仲要繼續凍多幾日,  Blog 友們要多多保重呀! 穿多件衫至於, 唯有煮多啲熱辣辣食物來取暖啦!

今晚我就用蒜蓉豆豉醬煮排骨, 夠晒惹味開胃, 飯都會食多d. (食多d, 個人熱量都會提高, 自然就會暖笠笠啦!)

材料

排骨 ($26), 毛茄 (8 條 - 切小粒), 蒜頭 (3 粒 - 切粒)

醃料

生抽 (2 茶匙), 糖 (1 茶匙), 紹興酒 (半茶匙)

油 (半茶匙), 生粉 (半茶匙)

調味料

蒜蓉豆豉醬 (1 湯匙), 糖 (2 茶匙), 暖水 (1 1/2 碗)

做法
1) 排骨清洗乾淨, 抺乾水份, 用醃料醃約30 分鐘,備用.

2) 毛茄清洗乾淨, 切粒, 備用.

3) 燒熱鑊落油, 爆香蒜蓉, 加入排骨炒勻, 贊酒, 下蒜蓉豆豉醬爆香, 下糖及暖水加蓋煮約 8-10分鐘.

4) 加入毛茄拌勻, 加蓋煮約 2分鐘, 熄火就可盛起食用.