蕃茄紅蘿蔔炆牛肋骨

 

嚟緊星期六及日又會好凍, 大家一定要穿多件衫保暖, 除了穿多件衫也可食的熱食保暖. 保暖食物離不開打邊爐, 羊腩煲, 炆牛腩.....等等. 今次介紹呢味餸酸酸甜甜又保暖, 是一款送飯 or 配意粉好餸.

材料
牛肋條 (約 8 -10 條), 紅蘿蔔 (1 條 - 切小粒)
洋蔥 (2 個 - 切條), 番茄 (3-4 個 - 切粒), 蕃茄膏 (2/3 罐)
乾蔥 (2 粒 - 切碎), 蒜頭 (6 粒 - 切碎), 薑茸 (2 湯匙)
牛油 (50 克), 暖水 (足夠蓋過所材料就OK)

調料味
牛肉湯粒 (1 粒), 冰糖 (適量), 黑胡椒 (2 茶匙)
百里香 (2 茶匙), 鹽 (1 茶匙)

做法
1) 牛肋條汆水後備用.

2) 燒熱鑊下牛油, 跟住加入乾蔥, 蒜茸, 薑茸爆香, 然後再放入洋蔥抄兜, 直至洋蔥開始軟身及微黃.

3) 然後加入蕃茄, 蕃茄膏, 牛肋條及暖水煮一陣, 當水滾起時就加入牛肉湯粒, 冰糖, 黑胡椒及百里香用小火炆煮30 分鐘, 跟住熄火焗20分鐘, 再開小火炆煮30 分鐘, 再熄火焗20分鐘, 最後再開小火炆煮30 分鐘, 加入鹽調味就可享用.
 

 愛心小胋士

1) 每次炆煮這個餸, 我都會早一日前炆煮等, 到第二日食時更入味.

 

2) 用鹽調味我會係在第二日取出來食時才會加上調味.



有營蔬菜湯

 

聖誕節快樂! 祝大家有一個平安又開心聖誕節. 係呢個咁開心節日氣氛下, 相信大家都會食多咗好多東西. 所以今日介紹個蔬菜湯給大家, 呢個湯全部材料都係蔬菜, 係無加到肉頪. 絕對健康又有益.

 

材料

粟米 (3 - 4 條 - 切開一半), 紅蘿蔔 (1 1/2 條 - 切小粒)

椰菜 (半個 - 切開 4 份), 薯仔 (2 大個 - 切小粒)

洋蔥 (1 - 2 個 - 切條), 蕃茄 (4 - 5 個 - 切粒), 鹽 (約 1 茶匙)

 

做法

1) 預備一深鍋開火煲滾一鍋水, 同時間燒熱平底鑊加少許油, 加入洋蔥兜炒, 直到變軟及微黃.

 

2) 當深鍋水滾起時, 加入粟米, 紅蘿蔔, 椰菜, 薯仔, 蕃茄及洋蔥, 當水再滾起時, 轉細火保約 2.5 小時下鹽調味, 就可慢慢享用.

 

 

愛心小貼士

因當天我煲這個湯時只係加了 3 個蕃茄, 味道係啖咗少少, 所以後來我加了約 2 匙茄膏, 正個湯味道就好味好多了.


迷迭香焗羊架

 

我一家人都好喜歡食羊肉, 尤其係西式羊架. 早前在超市買了一包羊胺回家, 佢本身己經切好一件件, 所以好容易處理. 我只需加少少香料就能焗出一件件好味羊架.

 

材料

羊胺 (6 件), 新鮮迷迭香 (3 - 4 札 - 只要有葉部份)

橄欖油 (適量), 海鹽 (適量)

 

做法

1) 先解凍羊胺, 然後用清水洗一洗, 抺乾淨水份, 備用.

 

2) 將焗爐預熱 200 度備用. 同時間用一個小盆加入海鹽, 橄欖油, 新鮮迷迭香 (只要葉部份) 混合後就加入羊架伴勻所有醃料, 放在平底鑊煎至兩面少少微黃後就取出.

 

3) 將煎好羊架放入已預備好焗盆裏再灑下少許新鮮迷迭香, 用錫紙包好放入焗爐用 200度焗約 25分鐘, 然後打開錫紙每面焗 5-7分鐘, 然後取出待涼10分鐘後就可享用. 伴薄荷啫喱食更加好味.

 

 

梅子炆鴨

 

今日去超市諗住買隻雞, 誰不知俾我見到一包已切好一件件又新鮮鴨肉, 當我一攞上手我就諗到用嚟炆梅子應該會好好味. 哈哈.........果然無錯, 煮出嚟酸酸味味加上嫩滑鴨肉的確餸飯一流, 我家奶奶勁鍾意食. 唯一賣相就麻麻地. 或許我影得差呱!!!

 

材料

鮮鴨 (半隻), 薑 (4 - 5 片), 梅子 (4 - 5 粒 - 要壓爛用)

蒜頭 (5- 6 粒 - 切小粒), 乾蔥 (2 粒 - 切小粒), 磨豉醬 (2 湯匙)

老抽 (2 茶匙), 冰糖 (40 克), 滾水 (視乎鴨件份量)

 

做法

1) 鮮鴨清洗乾淨, 抺乾水份, 備用.

 

2) 熱鑊落油, 加入薑, 蒜頭 & 乾蔥爆香, 放入鮮鴨炒勻.

 

3) 然後再下磨豉醬兜勻, 然後加入老抽及已壓爛酸梅炒勻, 下滾水煮滾後, 再加入冰糖轉細火炆約 45 - 60分鐘即成.

 

 

愛心小貼士

當炆煮期間, 若汁料水份己差不多剩餘好少, 但鴨肉還未夠稔, 可以再加進滾水繼續炆煮.

豉汁蒸倉魚



材料

倉魚 (1 條) , 豆豉 (1 1/2 湯匙 - 剁碎), 蒜頭 (4 粒-切碎)

蒸魚豉油 (2 湯匙), 蔥 (切條)

 

做法

1) 倉魚用清水洗乾淨抺乾備用.

 

2) 將豆豉, 蒜蓉及蒸魚豉油撈勻倒在魚身上, 再放上蔥.

 

3) 用鑊注滿水及放入蒸架, 當水滾時放下倉魚蒸13-15分鐘即可享用.

 



九杞菜豬潤肉片湯

 

今日去街市買餸竟然俾我見到九杞菜, 這是我童年喜愛湯水之一, 今晚就煲一鍋慢慢同家人飲. WoW! 童年味道, 童年回憶.

 

材料

九杞菜 (1 扎), 豬潤 $10, 豬肉片 $10, 薑 (3 - 4 片)

 

醃料 (豬潤) 

胡椒粉 (少量), 紹興酒 (1 茶匙)

醃料 (豬肉片)

豉油, 糖, 鹽, 油, 生粉 (各適量)

 

做法

1) 先將九杞菜葉子摘下, 清洗乾淨, 待用.

 

2) 煲一鍋滾水, 下薑片, 豬潤及豬肉片, 當水再滾起時轉小火煲10分鐘.

 

3) 然後加入九杞菜煲10分鐘, 下鹽調味就 OK

 

 

紅椒菜脯炒雞粒

 

今日雨濕濕凍凍地最好食 d 暖笠笠食物, 例如打邊爐. 不過..........我己經好耐無玩煮飯仔, 勁想玩. 所以就玩咗以下呢個可以炒吓炒吓又可以食完暖笠笠小菜.

 

材料

雞排 2 件 (切粒), 菜脯 $ 2 (切粒), 紅椒 1 條 (切片)

蒜頭 5-6 粒 (切碎), 海鮮醬 (2 大茶匙)

 

醃料

豉油 (2 茶匙), 鹽 (1/2 茶匙), 糖 (1 茶匙)

胡椒粉 (少量), 油 (1/2 茶匙), 生粉 (1/2 茶匙)

 

做法

1) 將雞排用清水洗乾淨, 用紙巾抺乾切粒. 用醃料醃約 20 分鐘.

 

2) 燒熱鑊落油加入雞粒炒兜略熟透. 然後盛起待用.

 

3) 再下油加入蒜蓉, 紅椒及菜脯炒香, 放入雞粒一起炒, 再下海鮮醬兜勻, 加入適量鹽及糖調味加蓋焗30秒就可熄火上碟享用.

 

 

麵醬青瓜豬肉片

 

材料

青瓜 (2 條 - 滾刀法切大粒), 豬肉片 ($13)

麵豉醬 (1 湯匙), 蒜頭 (3 - 4 粒 - 切碎)

 

醃料

豉油, 糖, 鹽, 油, 生粉

 

做法

1) 豬肉片用清水洗淨抺乾, 用醃料醃約10分鐘.

 

2) 燒熱鑊落油, 下蒜蓉爆香, 加入豬肉片兜炒, 然後下麵豉醬炒勻.

 

3) 加入青瓜炒 2-3 分鐘, 注入暖水加蓋炆煮約 5 - 7 分鐘到即可上碟享用.



海帶昆布湯蕎麥麵

因這星期六公司要搬新 Office, 攪到我忙到嘔!!! 昨晚 OT 到8:00pm 才收工. 回家中途中好想食蕎麥麵. 就走咗去吉市買了一支濃縮昆布麵汁及一 pack 中華海帶番屋企煮了碗熱辣辣 "海帶昆布湯蕎麥麵"

材料
蕎麥麵 (1 扎), 中華海帶 (1 Pack - 份量隨個人需要)
濃縮昆布麵汁 (半碗飯碗 + 約 1碗半飯碗暖水)

做法
1) 煲一鍋滾水, 下蕎麥麵煮 3分15秒, 然後撈起備用.

2) 用一個小煲下濃縮昆布麵汁煮熱, 然後將麵汁倒在湯碗內, 加入己煮熟蕎麥麵及中華海帶就即可享用.

 

樓下呢支就係 "濃縮昆布麵汁"
 

 



日式咖喱紅蘿蔔薯仔雞翼

 

今個禮拜天氣會轉冬, 呵呵.......係時候煮啲暖烘烘食物. 日式咖喱是不錯選擇.

 

材料

雞翼 (12 隻), 紅蘿蔔 (2 條 - 切粒), 薯仔 (2 個 - 切粒)

洋蔥 (1 個 - 切塊), 蒜頭 3-4 粒 (切碎), 薑汁 (適量)

牛油 (1 湯匙), 日式咖喱磚 (3-4粒)

醃料
薑汁, 鹽 (3/4 茶匙)

做法

1) 雞翼解凍清洗乾淨, 抺乾水份, 用醃料醃約30分鐘. 燒熱平底鑊落油, 下雞翼煎到兩面微黃, 就撈起隔油備用.

2) 熱鑊下牛油, 加入蒜蓉及洋蔥炒香, 放入紅蘿蔔及薯仔兜勻, 然後加入雞翼及暖水加蓋轉細火炆煮約8分鐘.

3) 加入日式咖喱磚炆煮約 10-15分鐘, (其間留意剩餘水份, 若不夠就再加暖水) 最後下鹽調味即可食用.

 

 

瑞士汁雞翼 (加料版)

今晚參加了主內一位弟兄邀約飯聚, 他剛搬了新屋, 相約了幾位肢體一齊到他新家歡聚, 其中有的肢體我都不太認識, 但透過今晚飯聚大家彼此認識多了. 也深深感受到大家都好愛教會及愛神愛人. 弟兄邀請我地每人帶一款食物到他家一齊分享. 我就煮了 "瑞士汁雞翼 (加料版)"

何謂 "加料版"??? 因我今次除了用瑞士汁, 還加了八角及香葉, 令到個汁更香更好味!

材料
雞翼 (2 磅), 瑞士汁 (2 支), 冰糖 (適量)
薑 (3 - 4 片 - 切片), 蔥 (切段)
香葉 (3 - 4 片 - 撕碎), 八角 (2 -3 粒)

做法
1) 先解凍雞翼, 連同薑及蔥一齊下滾水中汆水, 然後將雞翼放入冰水中浸約10分鐘.

2) 在一深煲倒進瑞士汁, 水, 香葉及八角, 當汁料滾起時試味, 若想甜少少可以加入適量冰糖調味.

3) 加入雞翼, 當汁料再滾起時轉細火煮約 9 分鐘熄火讓雞翼留待煲中約 20 - 30 分鐘後取出享用.

 

愛心小貼士
瑞士汁和水比例一般係 1:1 但妳亦可以調教到自己喜歡味道.


十下十下

 

秋天終於到喇! 亦係開始打邊爐好時候, 而剛巧我家母親大人去了加拿大探親戚, 就相約細佬妹在她們家中十下十下. 一路食一路傾計實在太 Warm.

 

願主賜福我一家人天天平安又快樂, 也願他們早日信主, 阿門!

清蒸蟹

 

我家樓下街市新開了一檔海鮮店舖,比起同區店舖便宜好多, 就今次買呢兩隻靚蟹都只需要 $96.00 而我本人其實唔係好識得煮蟹, 所以我用最簡單方法去煮, 就係 "原隻清蒸蟹"

 

WoW! 原汁原味! So Good!

 

材料

蟹 (2 隻), 紅醋 (適量)

 

做法

1) 清洗乾淨蟹.

 

2)將蟹放在蒸鑊內蒸15 分鐘. 另用一個小碟倒入適量紅醋點蟹肉一齊食用.

 

 

李錦記呢款調味紅醋味道 so Good!



麵豉醬南瓜雞件

最近身體狀況不太好, 因早前左背至左小腿無力及好痲痺, 後來睇咗醫生, 話我係坐骨神經痛, 宜家每星期兩次去物理治療師做治療. 好感謝主! 現在情況好好多. 但宜家身體仍都會感到好攰及疼痛,而且醫師話我不要太操勞. 所以我都好專心休息. 安靜在主懷中, 等待主醫治及祝福. 而今次post 呢個餸是早前煮晚飯的小菜, 而呢個麵豉醬汁係我早前同事去北京旅行時買番嚟給我手信. 嘩! 好香麵豉味道, 炆煮出嚟餸送飯一流!

材料
南瓜 1/4 個 (切粒), 雞排 3 塊 (切粒), 麵豉醬/豆瓣醬 (約 2 湯匙)
蒜頭 3 - 4 粒 (切粒), 乾蔥 2 -3 粒 (切片)

雞排醃料
薑汁 (1 茶匙), 豉油 (1 茶匙), 鹽 (1/2 茶匙)
糖 (1/2 茶匙), 麻油 (少量), 粟粉 (1/2 茶匙)

做法
1) 雞排洗乾淨,抺乾水份, 然後切粒, 加入醃料撈勻備用.

2) 南瓜去皮去籽切粒備用.

3) 燒熱鑊落油, 下蒜頭及乾蔥爆香, 加入雞排炒勻.

4) 當雞排兜炒至轉微金黃色, 加入南瓜炒勻.

5) 下麵豉醬與所有材料炒勻. 注入暖水加蓋炆煮約 8-10 分鐘就OK 喇.
 

下面這款麵豉醬就是同事去北京旅行時在超市買回來手信.



煎羊扒伴薄荷啫喱

 

既然食西式麵包做晚餐, 當然主菜都要食西餐, 今晚就煮羊扒. 用最簡單烹調技巧及又快捷方法, 就能同 Honey 享受一頓豐富晚餐. 感謝主! 賜我們美食.

 

材料

新鮮羊扒 1 包 (共 4 件), 鹽 (適量)

黑胡椒 (適量), 薄荷啫喱 (適量)

 

做法

1) 在羊扒表面灑下鹽及黑胡椒.

 

2) 燒熱平底鑊落油, 下羊扒用中細火煎約 4 分鐘, 反轉另一面煎約 4分鐘即成. 伴薄荷啫喱食就絕配喇!

 



意式蕃茄麵包 Bruschetta

N 年前同 Honey 去過赤柱一間西班牙餐廳食過 Bruschetta, 從此他就愛上了. 宜家我會識玩吓煮飯仔. 他就會好想我煮給他食. 但今次其中一款食材 (羅勒) 我買唔到. 感覺上始終唔夠正宗. 但味道出奇有好清新喎! 絕對不錯架! 起碼我 Honey 都鍾意.

材料
法式麵包 一條 (切開一片片), 蕃茄 4 個 (切碎)
蒜頭 1 - 2 粒 (切開一半), 新鮮羅勒 (Basil) 二束 (用手撕碎)
橄欖油 (少許)

做法
1) 以小刀在蕃茄底部界十字, 煲滾一鍋水熄火放下蕃茄靜待十秒取出, 立刻放入冰水中 2秒後取出, 便能輕易去掉蕃茄皮, 然後切開蕃茄, 去籽及切成小粒, 隔水備用.

2) 新鮮羅勒用手撕碎 (我今次就買唔到無用到).

3) 將 1 & 2 放入大碗中, 加入適量橄欖油撈勻,見蕃茄包滿油光就OK (即成蕃茄羅勒醬).

4) 法式麵包切開一片片, 預熱焗爐約 160 度, 放入麵包烤焗到兩面金黃色, 搽上生蒜.

5) 將蕃茄羅勒醬放在麵包上, 加入適量鹽及黑胡椒碎就可享用.

日式料理翠肉瓜肥牛肉

 

自從認識了日本調味料 (醬油+味醂+料理酒) 就會好想用佢地嚟玩煮飯仔. 今日呢個餸係打開雪櫃見上次打邊爐剩番少少肥牛肉, 加上買了翠肉瓜就用佢哋嚟煮個日式料理. 簡單易做又好味, 大家都試吓!

 

材料

翠肉瓜 (1 條 - 切小粒), 肥牛肉 (約 8 -10 片), 蒜蓉 (3 - 4 粒)

 

調味料

醬油 (2 湯匙), 味醂 (2 湯匙), 料理酒 (1 湯匙)

糖 (少量 - 本身味醂是甜味, 可以試了味道才決定加多少糖)

 

做法

1) 熱鑊下油爆香蒜蓉, 加入翠肉瓜兜炒, 下調味料加水加蓋, 當水滾時轉細火煮.

 

2) 然後加入肥牛肉炒勻加蓋炆煮約 3-4 分鐘即成.

 



沙爹紅綠椒炒白豚肉片

 

打開雪櫃見沙爹醬就快到期, 係時候要用埋佢, 再加上聽人講黑豚肉煮餸好好味, 我好想試吓, 但我呢頭街市及超市都無黑豚肉賣, 祇有白豚肉就買嚟試吓. 唔........味道真係不錯.

 

材料

白豚肉 (1 包), 紅/綠燈籠椒 (各1 個 - 去籽切條)

蒜頭 (3 粒 - 切小粒), 乾蔥 (3 粒 - 切小片)

 

醃料

生抽 (約 2 茶匙), 紹興酒 (1 茶匙), 胡椒粉 (少量)

 

調味料

沙爹醬 (約 3 湯匙), 鹽 (約 1/2 茶匙)

糖 (約 1/2 茶匙), 暖水 (2-3 湯匙)

 

做法

1) 白豚肉解凍, 清洗乾淨, 抺乾水份, 用醃料醃住.

 

2) 熱鑊落油下蒜頭及乾蔥爆香, 加入白豚肉抄勻.

 

3) 再加入紅/綠燈籠椒快手兜勻, 下調味料炒勻加蓋煮約 3-4分鐘即成.


人間美食 - 至尊榴槤水晶粉

好後悔! 好後悔! 我咁遲先與 " 妳＂遇上. 妳美麗純潔外表，內裡甜甜香氣，心心令我好掛住妳，最好時時食到妳。至尊榴槤水晶粉，我愛死妳.

哈哈.......... 我講緊係我最近在 "發記"甜品店食到 "榴槤系列甜品" 這款甜品除了有榴槤, 還加有水晶粉. 兩者加埋一齊食真係人間極品. 當店員將美食給我時, 我第一個反應覺得好似食 "榴槤湯粉" 跟住我有覺得好似食西餐 "榴槤天使麵" 哈哈.......讓我無論在視覺及味覺上都好開心, 絕對是榴槤愛好者石不可錯過美食.

哎呀! 講起我又想食嘞!  ><
 

係咪好似天使麵呢?

 祇需 $39 絕對係超級抵食 ^^

 

蒜蓉油麥菜

 

今次Post 呢個餸係無特別, 只因係要食得健康又有益, 蔬菜必然是健康食品中 No.1

 

蔬菜好處相信大家都知道. 而油麥菜含有大量維生素和大量鈣、鐵、蛋白質、脂肪、維生素A、VB₁、VB₂等營養成分，具有降低膽固醇、治療神經衰弱、清燥潤肺、化痰止咳等功效，是一種低熱量、高營養的蔬菜.

 

材料

油麥菜 (1 斤), 蒜頭 (3-4 粒 - 切小粒), 紹酒 (2/3 茶匙)

鹽 (2/3 茶匙), 糖 (2/3 茶匙)

 

做法

1) 將油麥菜浸水一陣, 然後清洗乾淨.

 

2) 燒熱鑊落油, 下蒜蓉爆香.

 

3) 加入油麥菜快手炒勻約 2-3分鐘, 灒紹酒, 加鹽及糖炒勻. 再兜炒一會即成.

 

 

栗子炆雞

 

材料

栗子 (約半斤), 鮮雞 (半隻 - 切件)

蒜頭 (3 粒 - 切粒), 乾蔥 (3 粒- 切片)

 

醃料

薑汁 (1 茶匙), 紹興酒 (1 茶匙), 生抽 (1 湯匙)

老抽 (2 湯匙), 糖 (1/2 茶匙), 胡椒粉 (少許), 生粉 (1 茶匙)

 

調味料

生抽 (1 茶匙), 糖 (1/2 茶匙), 鹽 (1/2 茶匙), 生粉 (1/2 茶匙)

蠔油 (約 2 湯匙), 胡椒粉 (少許), 麻油 (少許)

 

做法

1) 將栗子去殼去衣.

 

2) 鮮雞清洗乾淨, 斬件, 用醃料醃約 20 分鐘.

 

3) 燒熱鑊落油爆香蒜蓉及乾蔥, 加入雞件爆香, 下栗子同炒勻, 加進暖水, 當水再滾時轉細火炆煮到雞件及栗子軟淋. 加入調味料煮到汁料濃稠就OK.

 

 

愛心小貼士

栗子去殼後會有一層衣黏著是好難撕去, 可以煲滾一鍋水, 熄火後放下栗子, 約10秒後逐粒取出放入冰水中浸 2-3 秒取出去衣. 這個方法是好容易將栗子去衣.



西洋菜陳腎豬骨湯

 

秋天已到, 係時候煲d 靚湯水滋潤下. 見街市開始有西洋菜賣, 加上早前去流浮山買了些陳腎回家, 就決定煲 "西洋菜陳腎豬骨湯" WoW! 好清甜好滋潤好好味!

材料
西洋菜 (1 斤), 陳腎 (2 件), 蜜棗 (6 粒)
西施骨 ($20), 果皮 (2 片), 南北杏 (少許)

做法
1) 煲滾一鍋水將西施骨汆水. 西洋菜浸水一陣, 然後清洗乾淨.

2) 另預備煲滾一小鍋水將陳腎汆水 (千萬不要同西施骨一齊汆水).

3) 果皮用水浸軟, 去除白色部份.

4) 燒熱一鍋水下西洋菜, 稍後當水再滾時加下其它所有材料, 當水再次滾起時就轉細火煲約 2-3 個鐘加鹽調味就可慢慢享用靚湯水.

木瓜雪耳湯圓糖水

今天是中秋節, 人月團圓大好日子. 妳/你係咪同家人或好友一齊慶祝緊呢? 今日我都度過了一個好特別中秋節. 早上返教會崇拜,下午參加了一對弟兄姐妹婚禮, 而且在當中能為她們讀經, 實在好開心又感恩. 願妳們一生一世都甜蜜幸福直到永遠.

今日就同大家分享一個同中秋節有關甜品 "木瓜雪耳湯圓糖水".

祝各位, 中秋節團團圓圓! 甜甜蜜蜜!

材料

雪耳 (2 個), 木瓜 (1 個), 南北杏 (少量)

芝麻湯圓 (份量隨大家), 冰糖 (隨個人口味)

做法
1) 將雪耳浸水, 雪耳發大後剪去硬身, 撕成小塊.

2) 木瓜去皮去核, 切成小塊.

3) 煲一鍋滾水, 加入雪耳, 木瓜及南北杏, 當水再滾時轉細火煲約 45分鐘, 然後加冰糖試味.

4) 再加入湯圓, 見湯圓浮面及漲大, 就可盛起, 一路賞月一路食用喇!



糖醋骨

 

材料

一字排骨(金沙骨) 約 1 斤

 

調味料

紹興酒 (1 湯匙), 生抽 (2 湯匙), 白糖 (3 湯匙)

鎮江醋 (4 湯匙), 水 (5 湯匙)

 

做法

1) 先清洗排骨, 放入沸水中拖水, 撈起備用.

 

2) 用一個鍋放入所有調味料煲滾, 然後加入排骨, 當水再滾時就轉細火炆煮約 1 小時或見汁收乾, 就可慢慢享用.

 

 

愛心小貼士

買排骨千萬唔好揀太瘦, 要揀帶有少少肥膏部份, 炆煮出嚟先淋身好味架!


土茯苓昆布海草瘦肉湯

 

今日完了崇拜同弟兄姐妹一齊Lunch. 順便問下大家這季節煲咩湯水好呢. 有位弟兄講佢話用生地, 熟地, 昆布, 海草, 瘦肉煲湯可以對皮膚敏感有幫助. Honey 時不時就話皮膚痕, 我就去咗藥材舖買材料, 店舖亞姐介紹我買這湯包: 野牛皮止痕湯. 煲出嚟這個湯雖然好深色, 但好清甜架.

 

功效

潤燥止痕, 袪濕涼血, 清熱解毒, 消痰散結

 

材料

湯包 - 土茯苓, 昆布, 海草, 大生地, 野牛皮, 瘦肉 ($20)

 

做法

1) 瘦肉清洗乾淨, 放入沸水中拖水, 撈起備用.

 

2) 將湯包所有材料洗淨.

 

3) 用湯煲煲滾水, 加入瘦肉及湯包材料, 待水滾後轉細火煲 2-3小時, 加入鹽調味, 即可慢慢飲用.

 



Sweet Friday Night@尖沙咀 Suzuki Cafe

呢兩日公司有同事去咗旅行, 要負責埋佢工作因此多咗好多嘢做. 好忙好攰!!! 所以今晚同Honey 去尖沙咀海旁行吓 Relax 吓. 少少涼風吹拂沿途又有海景睇, 真係好舒服. 後來去到海運大廈 Honey 話不如去3樓 LCX 行吓, 上到去我地發覺唔同在好多 (我地差不多有成1年幾無去過喇!) 宜家多咗好多小型但有好in年青品牌店舖. 行吓望吓見到間 Suzuki Cafe 見到佢有一個 2 人套餐 $248 (包湯 + 頭盤 + 2 個主菜 + 甜品 + 餐飲) 覺得價錢都Ok, 而且有海景位, 環境氣氛都好浪漫. 食物水準都不錯, 又夠熱, 份量都不會太細, 二人食都夠飽肚.

餐湯: 甘荀忌廉湯

4

頭盤: 南瓜松子仁沙律/ 牛油煎餃子/ 照燒雞翼

 自己杯餐飲 + $28 轉了杯 "蜜糖鮮奶抺茶" 及Honey 另叫了一支礦泉水

 

 主菜 1: 松露野菌櫻花蝦比薩

 

 主菜 2: 沖繩温泉蛋蒜香豚肉熱鍋飯

 Honey 餐飲: 特濃咖啡
甜品: 迷你鮮果橽

整體上來講我地都好滿意，而這間Cafe 環境除了適合情侶，也適合成班朋友一齊去食飯傾計架。

三杯雞

 

"三杯雞" 這個食譜係我舊年睇 "簡易食譜" 見到,當時已經好想嘗試煮呢個餸, 但後來唔知攪咩就忘記呢件事, 上星期無意中又在睇到食譜, 就下定決心一定要煮. 唔........果然味到不錯! 今次我仲加多咗乾蔥及蒜頭, 等煮出嚟香味更濃郁.

 

材料

雞 (1 隻 - 斬件), 乾蔥 (5 粒-切片)

蒜頭 (4 粒-拍扁), 薑 (3 塊-拍扁)

 

調味料

生抽 (2 湯匙), 老抽 (2 湯匙), 冰糖 (2 湯匙-舂碎)

紹興酒 (2 湯匙), 麻油 (2 茶匙), 暖水 1 杯 (約 250ml)

 

做法

1) 清洗乾淨隻雞, 斬件. 如果是雪藏雞就要放在滾水中拖水先, 去血水及雪味.

 

2) 燒熱鑊落油, 下薑, 乾蔥及蒜頭爆香, 聞到香味就加入雞件一齊炒勻.

 

3) 見雞件表面轉色就下調味料撈勻, 加蓋大火煮滾後轉細火炆約 20-30 分鐘或雞件軟身, 汁料收乾, 就可以熄火慢慢享用.

 



謝謝歡迎嚟過Blog 友

 

好嘢! 哈哈..........哈哈.......太開心! 今日我 Yahoo Blog 已經累積瀏覽人數有 2000 人. 實在太開心. 雖然不是一個好大數目, 但對我來講, 實在太開心又感動. 感謝主! 也多謝各位對我支持願意快時間去睇我寫d無為嘢(因我的文筆實在大差勁). 願我日後繼續有這份動力繼續寫Blog. 希望大家繼續支持我.

 

 



南瓜椰菜花

 

哈哈........今晚煮飯仔又係由 "南瓜" 做主角. 無辨法我太愛南瓜喇!
而且南瓜含有豐富維他命C及胡蘿蔔素，對人體健康是很有幫助.

 

材料

南瓜 (約 $8 - 切件), 椰菜花 (1 個)

 

調味料

鹽 (1/4 茶匙), 日式豉油 (1/4 茶匙), 味醂 (1/4 茶匙)

 

做法

1) 南瓜去皮切小件, 椰菜花洗淨切件, 放入滾水中(加鹽) 拖水約 3分鐘。撈起瀝乾水份備用.

 

2) 燒熱鑊落少許油, 下南瓜炒, 加滾水加蓋煮一陣 (見水收乾或南瓜開始淋淋地.

 

3) 下椰菜花一起炒勻, 加入調味料煮約 2分鐘就食得喇.